കാക്കനാട് : ഇന്നുമുതല്‍ ജില്ലാ ജയിലിലും മനോഹരമായ നെറ്റിപ്പട്ടം ലഭിക്കും. ജയിലിലെ തടവുകാരുടെ കരവിരുതിലാണ് നെറ്റിപ്പട്ടങ്ങളും തിടമ്പുകളും നിര്‍മിക്കുന്നത്. അലങ്കാരത്തിനായി വാഹനങ്ങളിലും വീടുകളിലും ഉപയോഗിക്കുന്നവ മുതല്‍ മൂന്നടി വലിപ്പം വരെയുള്ളവ ഇവിടെ നിര്‍മിക്കുന്നു. പൊതുവിപണിയില്‍ നാലായിരം മുതല്‍ അയ്യായിരം വരെ വിലയുള്ള നെറ്റിപ്പട്ടങ്ങള്‍ വിലക്കുറവില്‍ ലഭിക്കും. ജയിലിലെ ഫുഡ് ഫോര്‍ ഫ്രീഡം കൗണ്ടറിലാണ് വില്‍പനക്ക് സൗകര്യമൊരുക്കിയിരിക്കുന്നത്.
പരിശീലനം ലഭിച്ച അന്തേവാസികള്‍ക്കൊപ്പം സഹായത്തിനായി മറ്റ് തടവുകാരെയും ഏര്‍പ്പാടാക്കിയിട്ടുണ്ട്. തൃശ്ശൂര്‍ സെന്‍ട്രല്‍ ജയിലില്‍ നിന്നുള്ള അന്തേവാസിയെത്തിയാണ് നെറ്റിപ്പട്ടം നിര്‍മാണത്തിനുള്ള പരിശീലനം നല്‍കിയത്. രണ്ട് ദിവസം വേണ്ടിവരും ഒരു നെറ്റിപ്പട്ടം നിര്‍മാണത്തിന്. തൃശ്ശൂരില്‍ നിന്നാണ് നിര്‍മാണാവശ്യത്തിനുള്ള സാധന ങ്ങളെത്തിക്കുന്നത്. നെറ്റിപ്പട്ടം വില്‍പ്പനക്കായി മേള സംഘടിപ്പിക്കാനും അധികൃതര്‍ക്ക് പദ്ധതിയുണ്ട്. ജയിലലെ അന്തേവാസികളില്‍ ഭൂരിപക്ഷവും റിമാന്‍ഡ് തടവുകാരാണ്. പരമാവധി 14 ദിവസത്തേക്ക് റിന്‍മാന്‍ഡില്‍ കഴിയുന്ന തടവുകാര്‍ പുറത്തിറങ്ങുമ്പോള്‍ അവരുടെ ജീവിതം കരുപിടിപ്പിക്കാന്‍ പ്രാപ്തരാക്കുകയാണ് ലക്ഷ്യം.
നെറ്റിപ്പട്ട നിര്‍മാണത്തോടൊപ്പം മെഴുകുതിരി, ഡെക്കറേറ്റീവ് മെഴുകുതിരി, ചന്ദനത്തിരി, ഫിനോയില്‍, കാര്‍വാഷ്, ഡിഷ്വാഷ്,സോപ്പ്‌പൊടി, നീലം തുടങ്ങിവ കൂടി ഇതോടൊപ്പം അന്തേവാസികളെ പരിശീലിപ്പിച്ച് കഴിഞ്ഞു.
അന്തേവാസികള്‍ നിര്‍മിച്ച ഉത്പന്നങ്ങളെല്ലാം ജയിലിന് മുന്നിലെ കൗണ്ടറില്‍ നിന്ന് കുറഞ്ഞ നിരക്കില്‍ ലഭിക്കുമെന്ന് ജയില്‍ സൂപ്രണ്ട് ജി.ചന്ദ്രബാബു അറിയിച്ചു. ജയിലിലെ നെറ്റിപ്പട്ടങ്ങളുടെയും മറ്റ് ഉത്പന്നങ്ങളുടെയും ഉദ്ഘാടനം ഇന്ന് രാവിലെ 11ന് ജയില്‍ മേധാവി ആര്‍.ശ്രീലേഖ നിര്‍വഹിക്കും.