പെരുമ്പാവൂര്‍: മുട്ടക്കോഴി കുഞ്ഞുങ്ങളെ വിതരണം ചെയ്യുന്ന പദ്ധതി നടപ്പാക്കുമ്പോള്‍ സര്‍ക്കാര്‍ അംഗീകൃത ഹാച്ചറികളില്‍ നിന്നുള്ള കൊഴികുഞ്ഞുങ്ങളെ മാത്രമേ വിതരണം ചെയ്യണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നല്‍കി. ത്രിതല പഞ്ചായത്തുകളുടേയും സംസ്ഥാന സര്‍ക്കാരിന്റേയും സാമ്പത്തീക സഹായത്തോടെയാണ് കുടുംബശ്രീ അംഗങ്ങള്‍ ഉള്‍പ്പടെയുള്ളവര്‍ക്ക് സബ്‌സിഡി നിരക്കില്‍ മുട്ടകോഴി കുഞ്ഞുങ്ങളെ വിതരണം ചെയ്യുന്നത്. എന്നാല്‍ സര്‍ക്കാര്‍ അംഗീകൃത ഹാച്ചറികളില്‍ നിന്നുള്ള കൊഴികുഞ്ഞുങ്ങളെ വിതരണം ചെയ്യണമെന്ന നിബന്ധന മറികടന്ന് തമിഴ്‌നാട് ഉള്‍പ്പടെയുള്ള ഇതരസംസ്ഥാനങ്ങളില്‍ നിന്നും കോഴികുഞ്ഞുങ്ങളെ എത്തിച്ച് സ്വകാര്യ വ്യക്തികള്‍ നടത്തിവരുന്ന പോള്‍ട്രി ഫാമുകളില്‍ നിന്നുള്ള കോഴികുഞ്ഞുങ്ങളെ വിതരണം ചെയ്യാനുളള നീക്കമാണ് നടക്കുന്നതെന്ന് ചൂണ്ടിക്കാട്ടിയാണ് കോഴി കര്‍ഷകനായ കെ.എം അബ്ദുല്‍ റസാക്ക് മുഖ്യമന്ത്രിക്ക് നിവേദനം നല്‍കിയിരിക്കുന്നത്. കുടുംബശ്രീ അംഗങ്ങള്‍ക്ക് സൗജന്യ നിരക്കില്‍ മുട്ടക്കോഴി കുഞ്ഞുങ്ങളെ വിതരണം ചെയ്യുമ്പോള്‍ ഗുണമേന്മ ഉറപ്പുവരുത്താന്‍ അധികാരികള്‍ തയ്യാറാകണമെന്ന് വെങ്ങോല ഗ്രാമക്ഷേമ സമിതിയോഗം ആവശ്യപ്പെട്ടു. യോഗത്തില്‍ കെ.വി മത്തായി അധ്യക്ഷത വഹിച്ചു. എം.എ കൃഷ്ണന്‍കുട്ടി, ശിവന്‍ കദളി, കെ.വി ജോയ് എന്നിവര്‍ സംസാരിച്ചു.