പെരിയാട്ടടുക്കം:  പെരിയാട്ടടുക്കത്ത് കെ.എസ്.ആര്‍.ടി.സി ബസിടിച്ച് ഗുരുതരമായി പരുക്കേറ്റ  കുട്ടികളുടെ ചികിത്സയ്ക്കായി കെ.എം.സി.സി ചെരുമ്പ മേഖലയും വോയിസ് ഓഫ് ചെരുമ്പയും സഹായം കൈ മാറി. കഴിഞ്ഞ ആഴ്ചയാണ് നിര്‍ധന കുടുംബത്തില്‍പ്പെട്ട ഈ സഹോദരിമാരെ ബസ് തട്ടി തെറിപ്പിച്ചത്.
കടയില്‍ നിന്നു  സാധനങ്ങള്‍ വാങ്ങുന്നതിനു വേണ്ടിയാണ് ഇവര്‍ ദേശീയപാതയോരത്തേക്കു വന്നത്. അപകടത്തില്‍ ഗുരുതരമായി പരുക്കേറ്റ ഈ സഹോദരിമാര്‍   മംഗളൂരുവിലെ ആശുപത്രിയില്‍ ചികിത്സയില്‍ കഴിഞ്ഞു വരുകയാണ്.
കെ.എം.സി.സി ചെരുമ്പ മേഖല ട്രഷറര്‍ ഉബൈദ് ചെരുമ്പ മുസ്ലിം ലീഗ് ചെരുമ്പ ശാഖാ നേതാക്കള്‍ക്ക് തുക സഹായ ധനം കൈമാറി. ക്ലബിന്റെ വളര്‍ച്ചക്കായി സ്വരൂപിച്ച പണം കാരുണ്യ പ്രവര്‍ത്തനത്തിനു നല്‍കിയ ഇവരുടെ പ്രവര്‍ത്തനം മാതൃകാപരമായി.