കൊട്ടാരക്കര: അഞ്ചു കിലോ കഞ്ചാവുമായി സ്ഥിരം കുറ്റവാളിയെ റൂറല്‍ എസ്.പിയുടെ നേതൃത്വത്തില്‍ രൂപീകരിച്ച ഷാഡോ പൊലിസ് സംഘം തെന്മലയില്‍ നിന്നും പിടികൂടി. കഴുതുരത്തി അമ്പിളി വിലാസത്തില്‍ തെന്മല ബിജു എന്നുവിളിക്കുന്ന ബിജുവാ(41)ണ് പൊലിസിന്റെ പിടിയിലായത്. വിദ്യാര്‍ഥികള്‍ക്ക് കഞ്ചാവ് എത്തിച്ചുകൊടുക്കുന്ന സംഘത്തിലെ പ്രധാന പ്രതിയാണ് ഇയാള്‍. കൊട്ടാരക്കര, പുനലൂര്‍, കുണ്ടറ, എന്നിവിടങ്ങളില്‍ കഞ്ചാവ് എത്തിക്കുന്നത് ഇയാളുടെ നേതൃത്വത്തിലായിരുന്നു.
ആന്ധ്രാപ്രദേശിലെ ആക്കൂര്‍ എന്ന സ്ഥലത്തുനിന്നാണ് കഞ്ചാവ് കൊണ്ടുവരുന്നത്. ഒരു കൊലപാതകക്കേസിലും 21 അബ്കാരി കേസുകളിലും നാല് മേഷണക്കേസുകളിലും നിരവധി കഞ്ചാവു കേസുകളിലും പ്രതിയായ ഇയാള്‍ വിവിധ കാലങ്ങളിലായി പത്തു വര്‍ഷത്തോളം ജയില്‍ ശിക്ഷ അനുഭവിച്ചിട്ടുണ്ട്. സ്‌പെഷല്‍ ബ്രാഞ്ച് ഡി.വൈ.എസ്.പി അനില്‍ദാസ്, എസ്.ഐ മാരായ ബിനോജ്, രാജേഷ്, എ.എസ്.ഐ മാരായ ഷാജഹാന്‍, ശിവശങ്കരപ്പിള്ള, രാധാകൃഷ്ണപിള്ള, അജയകുമാര്‍, ആഷിക് കോഹൂര്‍, ബിനു എന്നിവരുള്‍പ്പെട്ട സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.