പാപ്പിനിശേരി: തുരുത്തിയിലെ പട്ടികജാതി കോളനി ഇല്ലാതാക്കി ദേശീയപാത ബൈപാസ് നിര്‍മിക്കുന്നതിനെതിരേ തുടങ്ങിയ കുടില്‍ കെട്ടി സമരം അഞ്ചാം ദിവസത്തിലേക്ക്. സമരത്തിന് പിന്‍തുണയുമായി കീഴാറ്റൂരിലെ ബൈപാസ് വിരുദ്ധ നേതാവ് സുരേഷ് കീഴാറ്റൂര്‍ സമരപന്തലില്‍ എത്തി. ധാര്‍മിക സമരത്തിന് എല്ലാ പിന്‍തുണയും വയല്‍കിളി നേതാവ് വാഗ്ദാനം ചെയ്തു. ഇന്ന് ഉച്ചയ്ക്ക് ശേഷം ഡി.സി.സി പ്രസിഡന്റ് സതീശന്‍ പാച്ചേനിയും സംഘവും സമരപന്തലിലെത്തും. മുന്‍ കെ.പി.സി.സി. പ്രസിഡന്റ് വി.എം സുധീരന്‍ ഇന്നലെ തുരുത്തി കര്‍മസമിതി കണ്‍വീനര്‍ കെ. നിഷില്‍ കുമാറുമായി ഫോണില്‍ ബന്ധപ്പെട്ട് പിന്‍തുണ അറിയിച്ചു. ഏതാനും ദിവസത്തിനുള്ളില്‍ സുധീരനും സമരപന്തലിലെത്തും. ലോക് ജന്‍ശക്തി പാര്‍ട്ടി ജില്ലാ പ്രസിഡന്റ് പി.കെ അയ്യപ്പനടക്കം വിവിധ തുറകളില്‍പെട്ട നിരവധിപേര്‍ ഇന്നലെ സമരപന്തലില്‍ എത്തി പിന്‍തുണയും സഹായവും വാഗ്ദാനം ചെയ്തു. വയക്കിളി നേതാവ് നമ്പ്രാടത്ത് ജാനകി ഇന്ന് തുരുത്തി സമരപന്തലില്‍ എത്തും. സമരം ശക്തമാക്കുന്നതിന്റെ ഭാഗമായി കലക്ടറേറ്റ് മാര്‍ച്ച് ഉള്‍പ്പെടെ യുള്ള സമരം നടത്താനും തിരുമാനിച്ചു.