ന്യൂസിലന്‍ഡ്: ഇന്ത്യന്‍ പുരുഷ ഹോക്കി ടീമിന്റെ പരിശീലകനായി ഹരേന്ദ്ര സിങിനെ നിയമിച്ചു. ഹോളണ്ട് കോച്ച് സോര്‍ഡ് മരിനയെ മാറ്റിയാണ് ഹരേന്ദ്ര സിങിനെ അവരോധിച്ചത്. മരിനയെ ഇന്ത്യന്‍ വനിതാ ടീമിന്റെ പരിശീലകനായി മാറ്റി നിയമിച്ചു. നേരത്തെ വനിതാ ടീമിന്റെ പരിശീലക സ്ഥാനത്ത് നിന്നാണ് മരിന പുരുഷ ടീമിന്റെ കോച്ചായത്. മരിന പുരുഷ ടീമിന്റെ കോച്ചായി ചുമതലയേറ്റതിനെ തുടര്‍ന്ന് വനിതാ ടീമിനെ പിന്നീട് പരിശീലിപ്പിച്ചത് ഹരേന്ദ്രയായിരുന്നു.
സ്ഥാനങ്ങള്‍ മാറ്റിയുള്ള നിയമനമാണ് ഹോക്കി ഇന്ത്യ ഇപ്പോള്‍ നടത്തിയത്. കോമണ്‍വെല്‍ത്ത് ഗെയിംസില്‍ ടീമിന് കാര്യമായ നേട്ടങ്ങളുണ്ടാക്കാന്‍ സാധിക്കാത്തതിനെ തുടര്‍ന്നാണ് പുതിയ പരിഷ്‌കാരം. നേരത്തെ മലയാളി ഗോള്‍ കീപ്പര്‍ ശ്രീജേഷിനെ പുരുഷ ടീമിന്റെയും റാണി രാംപാലിനെ വനിതാ ടീമിന്റെയും ക്യാപ്റ്റന്‍മാരാക്കിയും ഹോക്കി ഇന്ത്യ ടീമില്‍ അഴിച്ചുപണി നടത്തിയിരുന്നു.