അലനല്ലൂര്‍: നാട്ടുകല്‍ അണ്ണാംതൊടിയില്‍ പണം കവര്‍ച്ച ചെയ്ത കേസിലെ പ്രതി കോഴിക്കോട് തമരശ്ശേരി സ്വദേശി കല്ലാടികുന്ന് കൈതപോയില്‍ മൂസ മകന്‍ ഫൈസലിനെയാണ് നാട്ടുകല്‍ പൊലിസ് പിടികൂടിയത്.
കേസില്‍ ഉള്‍പ്പെട്ട പ്രതി കോടതിയില്‍ ഹാജരാവാതെ മുങ്ങി നടക്കുകയായിരുന്ന പ്രതിക്കെതിരെ കോടതി ലോങ്‌പെന്റിങ് വാറണ്ട് പുറപ്പെടുവിക്കുകയും തുടര്‍ന്ന് നാട്ടുകല്‍ പൊലിസ് നടത്തിയ അന്വേഷണത്തില്‍ പ്രതി വിദേശത്തേക്ക് കടന്നതായി വിവരം ലഭിച്ചു.
പാലക്കാട് ജില്ലാ പൊലീസ് മേധാവി ദേബേഷ് കുമാര്‍ ഐ.പി.എസിന്റെ നിര്‍ദേശപ്രകാരം പ്രതിക്കെതിരെ ലുക്ക് ഔട്ട് നോട്ടിസ് പുറപ്പെടുവിക്കുകയും ആയതിന്റെ അടിസ്ഥാനത്തില്‍ പ്രതി വിദേശത്ത്‌നിന്നും നാട്ടിലെത്തിയ സമയം കരിപ്പൂര്‍ വിമാനത്താവളത്തില്‍ വെച്ച് എമിഗ്രേഷന്‍ വിഭാഗത്തിന്റെ സഹായത്തോടെ നാട്ടുകല്‍ പൊലിസ് പ്രതിയെ പിടികൂടുകയായിരുന്നു.
തുടര്‍ന്ന് പാലക്കാട് ജില്ലാ അഡീഷണല്‍ സെഷന്‍ കോടതിയില്‍ ഹാജരാക്കിയ പ്രതിയെ കോടതി റിമാന്‍ഡു ചെയ്തു. സി.പി.ഒ മാരായ ഷിബു, കെ. സുജിത് നായര്‍, ഷിബുകൊറ്റാമന്‍ എന്നിവരടങ്ങുന്ന അന്വേഷണ സംഘമാണ് പ്രതിയെ പിടികൂടിയത്.