മണ്ണാര്‍ക്കാട്: നെല്ലിപ്പുഴയില്‍ നടത്തിയ പരിശോധനയില്‍ 11 കിലോ കഞ്ചാവുമായി രണ്ടുയുവാക്കള്‍ പിടിയിലായി. കോഴിക്കോട്ടേക്ക് പോകുന്ന ബസില്‍നിന്നാണ് ഇവരെ പിടികൂടിയത്. കോഴിക്കോട്, കൊടിയത്തൂര്‍ എരണ്ടത്ത് വീട്ടില്‍ രഞ്ജിത്ത് (20), സൗത്ത് കൊടിയത്തൂര്‍ വളപ്പില്‍ വീട്ടില്‍ ഹസീബ് എന്നിവരാണ് പിടിയിലായത്.
മണ്ണാര്‍ക്കാട് എക്‌സൈസ് റെയ്ഞ്ച് സംഘം രാവിലെ ആറുമണിക്ക് നടത്തിയ പരിശോധനയ്ക്കിടെയാണ് ഇവരെ പിടികൂടിയത്. ബസില്‍നിന്നും ഇറങ്ങിയോടാന്‍ശ്രമിച്ചെങ്കിലും എക്‌സൈസ് സംഘം ഓടിച്ചിട്ട് പിടിക്കുകയായിരുന്നു.
ചെന്നൈയില്‍നിന്നും ട്രെയിന്‍ മാര്‍ഗം പാലക്കാടെത്തിച്ച് കോഴിക്കോടേക്ക് ചില്ലറ വില്‍പ്പനയ്ക്കായി കടത്തുകയായിരുന്ന കഞ്ചാവാണ് പിടികൂടിയത്. ജില്ലാ ഡെപ്യൂട്ടി എക്‌സൈസ് കമ്മിഷണര്‍, അസി.എക്‌െൈസ് കമ്മിഷണര്‍ എന്നിവരുടെ നിര്‍ദേശാനുസരണം പരിശോധന തുടരുമെന്നും കഞ്ചാവിന്റെ ഉറവിടം അന്വേഷിച്ച് വരികയാണെന്നും എക്‌സൈസ് ഇന്‍സ്‌പെക്ടര്‍ അബ്ദുല്‍ അഷറഫ് പറഞ്ഞു. പ്രവന്റീവ് ഓഫിസര്‍ ഷാനവാസ്, സി.ഇ.ഒമാരായ രാജേഷ്, പ്രശാന്ത്, ചന്ദ്രന്‍, അശോക് സംഘത്തിലുണ്ടായിരുന്നു.