കൂളിവയല്‍ (വയനാട്): കേന്ദ്ര സര്‍ക്കാര്‍ നടപ്പിലാക്കിയ സാമ്പത്തിക സംവരണത്തെ പ്രതിരോധിക്കുന്നതില്‍ മുഖ്യധാരാ രാഷ്ട്രീയ പാര്‍ട്ടികള്‍ പരാജയപ്പെട്ടെന്ന് വയനാട്ടില്‍ നടക്കുന്ന എം.എസ്.എഫ് ദേശീയ നേതൃ ക്യാംപ് അഭിപ്രായപ്പെട്ടു.
പിന്നാക്ക ദലിത് വിഭാഗങ്ങളുടെ ഉന്നമനം ലക്ഷ്യമാക്കി ഭരണഘടന ഉറപ്പ് നല്‍കിയ അവകാശത്തെ തകര്‍ക്കുകയാണ് സാമ്പത്തിക സംവരണം നടപ്പിലാക്കുക വഴി കേന്ദ്ര സര്‍ക്കാര്‍ ചെയ്തത്.

ഇതിനെതിരേ രാജ്യത്തെ കേന്ദ്ര സര്‍വകലാശാലകളിലും കാംപസുകളിലും ദലിത് പിന്നാക്ക വിദ്യാര്‍ഥി സംഘടനകളെയും സമാന മനസ്‌കരേയും അണിനിരത്തി യോജിച്ച മുന്നേറ്റത്തിന് എം.എസ്.എഫ് നേതൃത്വം നല്‍കും.
രാജ്യത്തെ ഉന്നത വിദ്യാഭ്യാസ സ്ഥാപനങ്ങളിലും സര്‍വകലാശാലകളിലും നിയമനത്തിന് മാനദണ്ഡമാക്കിയിരുന്ന 200 പോയിന്റ് റോസ്റ്റര്‍ സംവിധാനത്തിന് പകരം 13 പോയിന്റ് റോസ്റ്റര്‍ മാനദണ്ഡം നടപ്പിലാക്കുന്നത് വഴി സംവരണത്തിന്റെ അടിസ്ഥാന തത്വങ്ങളുടെ നഗ്‌നമായ ലംഘനമാണ് നടക്കാന്‍ പോകുന്നത്. ഇത് പിന്നാക്ക-ദലിത് വിഭാഗങ്ങളുടെ ഉന്നത വിദ്യാഭ്യാസ അവസരങ്ങള്‍ക്ക് വിഘാതം സൃഷ്ടിക്കുന്ന നടപടിയാണെന്നും നേതൃ ക്യാംപ് അഭിപ്രായപ്പെട്ടു. പി.വി അബ്ദുല്‍ വഹാബ് എം.പി ഉദ്ഘാടനം നിര്‍വഹിച്ചു. ടി.പി അഷ്‌റഫലി അധ്യക്ഷനായി.

പി.പി.എ കരീം, എസ്.എച്ച് മുഹമ്മദ് അര്‍ഷാദ്, ഇ ഷമീര്‍, അഡ്വ. എന്‍.എ കരീം, പി.വി അഹമ്മദ് സാജു, അതീബ്ഖാന്‍, അല്‍ അമീന്‍, ഫാത്തിമ തഹ്ലിയ, സിറാജുദ്ധീന്‍ നദ്‌വി, മിസ്ഹബ് കീഴരിയൂര്‍, എം.പി നവാസ്, പി. ഇസ്മായില്‍, ഷിബു മീരാന്‍, പി.കെ അസ്മത്ത്, അസീസ് കളത്തൂര്‍, സി.എച്ച് ഫസല്‍, റിയാസ് നാലകത്ത്, മന്‍സൂര്‍ ഹുദവി, ഫൈസാന്‍ ചെന്നൈ, ഖൈസര്‍ അബ്ബാസ്(ഉത്തര്‍പ്രദേശ്), നൂറുദ്ധീന്‍ മൊല്ല (പശ്ചിമ ബംഗാള്‍), എം. അന്‍സാരി (തമിഴ്‌നാട്), ഇമ്രാന്‍ ആലം (ബിഹാര്‍), അഡ്വ. അബ്ദുല്‍ ജലീല്‍ (കര്‍ണാടക), ജാവേദ് അക്രം (പഞ്ചാബ്), തൗസീഫ് ഹുസൈന്‍ റാസ(അസം), ഷഹബാസ് ഹുസൈന്‍ (ജാര്‍ഖണ്ഡ്) സംസാരിച്ചു.
വിവിധ സെഷനുകള്‍ക്ക് എം.സി വടകര, റാഷിദ് ഗസ്സാലി, ഷറഫുദ്ധീന്‍ ഹുദവി (ദാറുല്‍ ഹുദ പൂങ്കനൂര്‍ കാംപസ്), ഇഗ്‌നോ സര്‍വകലാശാല മുന്‍ പ്രോ വൈസ് ചാന്‍സിലര്‍ ഡോ. ബഷീര്‍ അഹമ്മദ് എന്നിവര്‍ നേതൃത്വം നല്‍കി. വ്യത്യസ്ത സെഷനുകളില്‍ വയനാട് ജില്ലാ പഞ്ചായത്ത് പ്രസിഡന്റ് കെ.ബി നസീമ, ജയന്തി രാജന്‍, പടയന്‍ മുഹമ്മദ്, യഹ്യാഖാന്‍ തലക്കല്‍ സംബന്ധിച്ചു.