തൃക്കരിപ്പൂര്‍: ഇടയിലെക്കാട് കാവിനെ കണ്ടും തൊട്ടുമറിഞ്ഞ് സസ്യ വൈവിധ്യ സര്‍വേ. സംസ്ഥാന ജൈവവൈവിധ്യ ബോര്‍ഡ് കാവിന് ജൈവവൈവിധ്യ പൈതൃക പദവി നല്‍കുന്നതിന്റെ ഭാഗമായാണ് ഓരോ സസ്യങ്ങളെയും തിരിച്ചറിഞ്ഞുള്ള കണക്കെടുപ്പ് ആരംഭിച്ചത്. ഇടയിലെക്കാട് നവോദയ വായനശാല ആന്‍ഡ് ഗ്രന്ഥാലയത്തിനായിരുന്നു സര്‍വേ നിര്‍വഹണ ചുമതല. പുല്‍വര്‍ഗം തൊട്ട് വന്‍മരങ്ങള്‍ വരെ ഗവേഷക സംഘവും പഴമക്കാരും കുട്ടികളും ഗ്രന്ഥശാലാ പ്രവര്‍ത്തകരും തിരിച്ചറിഞ്ഞു. അവയോരോന്നിന്റെയും സവിശേഷതകള്‍ ഗവേഷക സംഘം പഴമക്കാരുടെ നാട്ടറിവുകള്‍ ചേര്‍ത്തു കലര്‍ത്തി കുട്ടികള്‍ക്ക് വിശദമാക്കി നല്‍കി.
കാവിലെ പലതരം കാട്ടുപഴങ്ങള്‍, കാട്ടുപൂക്കള്‍ എന്നിവയെ കുറിച്ചുള്ള അറിവുകള്‍ കുട്ടികള്‍ക്ക് കൗതുകം പകരുന്നതായിരുന്നു. 112 തരം സസ്യങ്ങളെയാണ് ആദ്യഘട്ടം സര്‍വേയില്‍ കണ്ടെത്തിയത്. മെയ് മാസത്തോടെ വേനല്‍ക്കാല സസ്യ സര്‍വേ പൂര്‍ത്തിയാകും. ജൂണ്‍, ജൂലൈ മാസങ്ങളില്‍ മഴക്കാല സസ്യ സര്‍വേ നടത്തുന്നതോടെ മുഴുവന്‍ സസ്യങ്ങളും ജൈവ വൈവിധ്യ പട്ടികയില്‍ ഇടം പിടിക്കും. കാവിലെ മരങ്ങളില്‍ പറ്റിപ്പിടിച്ച് വളരുന്ന പരാദ സസ്യങ്ങള്‍, ഫംഗസുകള്‍, കൂണുകള്‍, ചെറുജീവികള്‍, പക്ഷികള്‍, പൂമ്പാറ്റകള്‍, ഇഴജന്തുക്കള്‍, വന്യ ജീവികള്‍ തുടങ്ങിയവയെപ്പറ്റി വിവിധ സര്‍വകലാശാലകളിലെ ഗവേഷണ വിദഗ്ധരെ കൂടി പങ്കെടുപ്പിച്ച് സര്‍വേ സമ്പൂര്‍ണമാക്കി ജൈവ വൈവിധ്യ ബോര്‍ഡിന് പട്ടിക സമര്‍പ്പിക്കും. ഇതോടൊപ്പം കാവിന്റെ ജൈവസമ്പന്നതയെയും അതിന്റെ പ്രാധാന്യത്തെയും പരിചയപ്പെടുത്തിയുള്ള ബോധവല്‍ക്കരണ ക്ലാസുകളും സംഘടിപ്പിക്കും.
യോഗത്തില്‍ സസ്യ ഗവേഷകരും പരിസ്ഥിതി പ്രവര്‍ത്തകരുമായ ഡോ. ഇ. ഉണ്ണികൃഷ്ണന്‍, വി.സി ബാലകൃഷ്ണന്‍, ആനന്ദ് പേക്കടം, വലിയപറമ്പ് പഞ്ചായത്ത് അംഗം വി.കെ കരുണാകരന്‍, ജൈവവൈവിധ്യ ബോര്‍ഡ് ജില്ലാ കോര്‍ഡിനേറ്റര്‍ പി. കൃഷ്ണന്‍, നവോദയ ഗ്രന്ഥാലയം സെക്രട്ടറി പി. വേണുഗോപാലന്‍, പ്രസിഡന്റ് പി.വി പ്രഭാകരന്‍, വി. ശ്രീധരന്‍, സി.എച്ച് സുകുമാരന്‍, എം. ബാബു, എം. ലക്ഷ്മണന്‍, എ. സുമേഷ് സംസാരിച്ചു.