കൊട്ടാരക്കര: എം.സി. റോഡില്‍ കൊട്ടാരക്കരയ്ക്കു സമീപം കെ.എസ്.ആര്‍.ടി.സി. സൂപ്പര്‍ഫാസ്റ്റ് ബസും ചരക്കു ലോറിയും കൂട്ടിയിടിച്ച് 34 പേര്‍ക്ക് പരുക്കേറ്റു.
രണ്ടുപേരുടെ പരുക്ക് ഗുരുതരമാണ്. പരുക്കേറ്റവരെ കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ 9.30 ഓടെയായിരുന്നു അപകടം. കരക്കകത്തിന് സമീപം നിര്‍ത്തിയിട്ടിരുന്ന ബസിനെ മറികടന്ന് അമി തവേഗതയിലെത്തിയ ചരക്കു ലോറി എതിര്‍ദിശയില്‍ നിന്നും വന്ന തിരുവനന്തപുരം-ഗുരുവായൂര്‍ ബസില്‍ ഇടിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു. ബസിന്റെ മുന്‍ഭാഗത്തുള്ളവരാണ് പരുക്കേറ്റവരില്‍ ഏറെയും. ബസ് ഡ്രൈവര്‍ നോര്‍ത്ത് പരവൂര്‍ നീലിക്കോട് കൊടുവഴങ്ങ പീച്ചിലിക്കാട് വീട്ടില്‍ ബിജുവി(42)നെ ഏറെ പണിപ്പെട്ടാണ് ബസില്‍ നിന്നും പുറത്തെടുത്തത്.  കാലിന് ഗുരുതരമായി പരുക്കേറ്റ ഇയാളെ പ്രാഥമിക ശുശ്രൂഷ നല്‍കിയ ശേഷം എറണാകുളം ജില്ലാ ആശുപത്രിയിലേക്ക് മാറ്റി. മാറനാട് പോസ്റ്റോഫീസിലെ ജീവനക്കാരി അണ്ടൂര്‍ നാരായണ വിലാസത്തില്‍ രമണിക്കൂട്ടിയമ്മയു(62)ടെ പരുക്ക് ഗുരുതരമാണ്. ഇവര്‍ക്ക് കൈക്ക് ഒടിവും കാലിന് പരുക്കുമേറ്റിട്ടുണ്ട്. പരുക്കേറ്റവരെ പൊലിസും ഫയര്‍ഫോഴ്‌സും നാട്ടുകാരും ചേര്‍ന്നാണ് ആശുപത്രിയില്‍ എത്തിച്ചത്. ലോറി ഡ്രൈവര്‍ ആലപ്പുഴ, പാതിരപ്പള്ളി കാരയ്ക്കാട്ട് വീട്ടില്‍ ജോണി(31)നെ കൊട്ടാരക്കര പൊലിസ് കസ്റ്റഡിയിലെടുത്തു. ഇയാള്‍ക്കും നേരിയ പരുക്കേറ്റിട്ടുണ്ട്.
പരുക്കേറ്റ ബസ് കണ്ടക്ടര്‍ തിരുവനന്തപുരം പാലോട് തടത്തിലഴികത്ത് വീട്ടില്‍ ജസ്റ്റസ് (31), യാത്രക്കാരായ അബിമോള്‍ (38) നിലമേല്‍, അജിത (42) കൊട്ടാരക്കര, അശ്വതി (30) മടവൂര്‍, ഡേവിഡ് (52) പാലോട,് ദീപ (30) വെഞ്ഞാറമൂട,് ദീപ (37) കിളിമാനൂര്‍, ഗോപാലകൃഷ്ണപിള്ള (70) അഞ്ചല്‍, ജിഷാ രാജു (19) പന്തളം, എം.എസ്.രവി (63) വാക്കനാട്, മണികണ്ഠന്‍ (43) ചടയമംഗലം, നയനന്‍ (48) ആയൂര്‍, റഷീദ് (55) ചിതറ, രേഖ (41) ഉമ്മന്നൂര്‍, രത്‌നമ്മ (65) വാളകം, സന്തോഷ് (37) ഇടുക്കി, സതീശന്‍ (37) പുനലൂര്‍, സവിത (33) തലവൂര്‍, സിന്ധു (43) പുനലൂര്‍, സിന്ധു ഡാനിക്കുട്ടി (33) വാളകം, സിന്ധു (33) വെളിയം, സിന്ധു (27) കടയ്ക്കല്‍, സുഹാന (27) ആയൂര്‍, സ്വപ്ന (38) ചടയമംഗലം, തങ്കമണി (39) വാളകം, ഉഷ (45) അണ്ടൂര്‍, ഉഷാകുമാരി (50) അഞ്ചല്‍, മുരളി (48) തിരുവനന്തപുരം, ശ്രീജ പ്രശാന്ത് (28) പൊലിക്കോട്, ജയകൃഷ്ണന്‍ (48) കിളിമാനൂര്‍, ബിജു (35) പന്തളം എന്നിവരെ കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു.