മലപ്പുറം: സ്‌കൂളുകളിലെ ലൈബ്രറികള്‍ വിദ്യാര്‍ഥികള്‍ക്ക് ഫലപ്രദമായി ഉപയോഗിക്കുന്നതിന്റെ ഭാഗമായി പി.ടി.എ യുടെ സഹായത്തോടെ ലൈബ്രറിയന്മാരെ നിയമിക്കാനുള്ള നടപടി സ്വീകരിക്കാന്‍ സ്‌കൂള്‍ ലൈബ്രേറിയന്‍മാര്‍ക്കായി നടത്തിയ ശില്‍പശാലയില്‍ തീരുമാനമായി. നിലവില്‍ മറ്റുവിഷയങ്ങള്‍ പഠിപ്പിക്കുന്ന അധ്യാപകന്‍ തന്നെയാണ് ലൈബ്രറിയുടെയും ചുമതല വഹിക്കുന്നത്. ഇത് വിദ്യാര്‍ഥികള്‍ക്ക് ആവശ്യമായ പുസ്തകങ്ങള്‍ ലഭ്യമാകുന്നതിന് തടസമാവുന്നുണ്ട്. അതിനാല്‍ ജില്ലയിലെ തന്നെ ചില സ്‌കൂളുകള്‍ നടപ്പാക്കിയത് പോലെ ലൈബ്രേറിയന്‍ നിയമനം പി.ടി.എ യെ ചുമതലപ്പെടുത്തുമെന്ന് വിദ്യാഭ്യാസ ഡെപ്യൂട്ടി ഡയറക്ടര്‍ പി. സഫറുള്ള അറിയിച്ചു. ഇതിനായി വിദ്യാഭ്യാസ ജില്ലാതലത്തില്‍ പി.ടി.എ യോഗം ഉടന്‍ വിളിച്ച് ചേര്‍ക്കും. സ്‌കൂള്‍ സമയം കഴിഞ്ഞും ലൈബ്രറി ഉപയോഗിക്കാനുള്ള സാധ്യതകള്‍ പരിശോധിക്കും.
പി.എന്‍. പണിക്കരുടെ സ്മരണയ്ക്കായുള്ള വായനാവാരം പരിപാടികളോടനുബന്ധിച്ച് ജില്ലാ ഇന്‍ഫര്‍മേഷന്‍ ഓഫീസും വിദ്യാഭ്യാസ വകുപ്പും സംയുക്തമായാണ് ശില്‍പശാല നടത്തിയത്. ഒരു സബ് ജില്ലയില്‍ നിന്നും ലൈബ്രറിയുടെ ചുമതലയുള്ള മൂന്ന് പേര്‍ വീതമാണ് പങ്കെടുത്തത്. സ്‌കൂള്‍ ലൈബ്രറികള്‍ കാര്യക്ഷമമാക്കാനുള്ള വിവിധ നിര്‍ദേശങ്ങള്‍ യോഗത്തില്‍ ഉയര്‍ന്നു. സ്‌കൂളുകളിലും വീടുകളിലും വിദ്യാര്‍ഥികള്‍ക്ക് വായനയ്ക്ക് സൗകര്യമൊരുക്കി ആസ്വാദനകുറിപ്പുകള്‍ നിക്ഷേപിക്കാനുള്ള എഴുത്ത് പെട്ടികള്‍ സ്ഥാപിക്കുകയും വിദ്യാര്‍ഥികളുടെ അഭിരുചിക്കനുസരിച്ച് പുസ്തകങ്ങള്‍ തിരഞ്ഞെടുക്കാനുള്ള അവസരമൊരുക്കുകയും ചെയ്യണം. ലൈബ്രറിക്കായി പ്രത്യേക മുറി സജ്ജമാക്കണം.
പഴയ ഗ്രന്ഥങ്ങളും മാസികകളും ഡിജിറ്റലൈസ് ചെയ്യണം. വായനയ്ക്കായി പരമ്പരാഗത രീതികള്‍ക്കൊപ്പം പുതിയ സാങ്കേതിക വിദ്യകളും പ്രയോജനപ്പെടുത്തണം. സ്‌കൂളുകള്‍ക്ക് തൊട്ടടുത്തുള്ള പൊതു വായനശാലകളില്‍ നിന്നും കുട്ടികള്‍ക്ക് പുസ്തകങ്ങള്‍ ലഭ്യമാക്കാനുള്ള സംവിധാനങ്ങള്‍ ലൈബ്രറി കൗണ്‍സിലുമായി സഹകരിച്ച് നടപ്പാക്കാം. ലൈബ്രറി സൗകര്യങ്ങളൊരുക്കുന്നതിനായി തദ്ദേശ സ്വയംഭരണ സ്ഥാപനങ്ങള്‍, പൂര്‍വ വിദ്യാര്‍ഥികള്‍, മറ്റ് സ്‌പോണ്‍സര്‍മാര്‍ എന്നിവരുടെ സഹായം തേടണം. വിദ്യാര്‍ഥികളുടെയും അധ്യാപകരുടെയും സര്‍ഗാത്മക സൃഷ്ടികള്‍ പ്രസിദ്ധീകരിച്ച് പ്രോത്സാഹനം നല്‍കണം. കുട്ടുകളിലൂടെ രക്ഷിതാക്കളിലും വായനാശീലം വളര്‍ത്തണം. മികച്ച സ്‌കൂള്‍ ലൈബ്രറികള്‍ക്കും നന്നായി വായിക്കുന്ന അധ്യാപകനും അവാര്‍ഡ് നല്‍കുന്നത് പരിഗണിക്കും തുടങ്ങിയ നിര്‍ദേശങ്ങളാണ് യോഗത്തില്‍ ഉയര്‍ന്നത്.
ഇ-ലൈബ്രറിയുടെ സാധ്യതകളെക്കുറിച്ച് ഐ.ടി.@സ്‌കൂള്‍ ജില്ലാ കോഡിനേറ്റര്‍ ഹബീബ് റഹ്മാന്‍ സംസാരിച്ചു. വിദ്യാഭ്യാസ ഡെപ്യൂട്ടി ഡയറക്ടര്‍ പി. സഫറുള്ള, ജില്ലാ ഇന്‍ഫര്‍മേഷന്‍ ഓഫീസര്‍ വി.പി സുലഭ കുമാരി, അസി. അസി. ഇന്‍ഫര്‍മേഷന്‍ ഓഫീസര്‍ കെ. മുഹമ്മദ് എന്നിവര്‍ സംസാരിച്ചു.