കൊല്ലങ്കോട്: തെന്മലയില്‍ ഉരുള്‍പൊട്ടലിന് കാരണം പാറഖനനം വര്‍ധിച്ചതാണെന്ന് വിദഗ്ധര്‍. തെന്മലയോരത്തെഎലവഞ്ചേരി മുതല്‍ മുതലമടവരേയുള്ള 21 കിലോമാറ്റര്‍ ദൈര്‍ഘ്യത്തിലുള്ള പ്രദേശങ്ങളിലാണ് അനധികൃത പാറഖനനം നടക്കുന്നത്. പാറഖനനത്തിനെതിരെ കര്‍ശ്ശനമായ വിലക്കുകള്‍ ഉണ്ടെങ്കിലും ഇവ മറികടന്നാണ് ക്വാറികളും ക്രഷറുകളും പ്രവര്‍ത്തിച്ചുകൊണ്ടിരിക്കുന്നത്. കഴിഞ്ഞ ആറ് വര്‍ഷത്തിനിടെ തെന്മലയില്‍ നാല്തവണയിലധികമായി പാറഅടര്‍ന്ന് ഉരുള്‍പൊട്ടല്‍ ഉണ്ടായിട്ടുണ്ട്. തെന്മലയുടെ ഉയര്‍ന്നപ്രദേശങ്ങളില്‍ നിന്നുമാണ് പാറകള്‍ അടരുന്നത്. അത്യുഗ്രമായ ശബ്ദത്തോടെ ക്വാറികളില്‍നിന്നും സ്‌ഫോടനങ്ങള്‍ നടത്തുന്നതിനാല്‍ ഇവമൂലമുണ്ടാകുന്ന പ്രകമ്പനങ്ങളാണ് പാറകെട്ടുകള്‍ ഉരുള്‍പൊട്ടലിലൂടെ നിലംപതിക്കുവാന്‍ കാരണമെന്ന് അടിവാരപ്രദേശത്തുള്ളവരുംപറയുന്നു. പുലര്‍ച്ചെ സമയങ്ങളിലാണ് ജലാറ്റിന്‍ സ്റ്റിക്കുകളും ഡിറ്റനേറ്ററുകളും വ്യാപകമായി ഉപയോഗിച്ച് പാറപൊട്ടിക്കുന്നത്. ഇരുപതിലധികം പാറകൂട്ടങ്ങളെ ഒരേ സമത്ത് പൊട്ടിച്ച് തകര്‍ക്കുന്ന ശബ്ദം അതിഭയങ്കരമാണെന്ന് തെന്മലഅടിവാര പ്രദേശത്തുള്ളവര്‍ പറയുന്നു. അനധികൃതമായി ഇത്തരം ഉഗ്രശബ്ദത്തില്‍ പാറകള്‍പൊട്ടിച്ചെടുക്കുമ്പോള്‍ ഇതിനെതിരെയുള്ള ശബ്ദങ്ങളെ ഭീഷണിപെടുത്തി ഒതുക്കുന്ന അവസ്ഥയാണ് എലവഞ്ചേരിമുതല്‍ മുതലമടവരേയുള്ള പ്രദേശങ്ങളില്‍ ഉണ്ടാകുന്നത്.
മുതലമട, കൊല്ലങ്കോട്, എലവഞ്ചേരി പഞ്ചായത്തുകളില്‍മാത്രം 62 ക്വാറികളാണ് നിലവില്‍ പ്രവര്‍ത്തിച്ചുകൊണ്ടിരിക്കുന്നത്.
റവന്യു അധികൃതര്‍ അനുവാദം നല്‍കാത്തവയാണ് ഇവയെല്ലാം. നിര്‍മ്മാണ മേഖല സ്തംഭിക്കുമെന്നതിനാലാണ് രാഷ്ട്രീയപാര്‍ട്ടികളുടെ സമ്മര്‍ദത്തില്‍ ക്വാറികള്‍ പ്രവര്‍ത്തിക്കുവന്‍ കാരണമെന്ന് നാട്ടുകാര്‍ ആരോപിക്കുന്നു. അനധികൃത ക്വാറികള്‍ക്കുപുറമെ അനധികൃത മണ്ണ് ഖനനവും ഇത്തരം പ്രദേശങ്ങളില്‍ വ്യാപകമായതിനാല്‍ ക്വാറികള്‍ക്കെതിരെയും മണ്ണ് ഖനനങ്ങള്‍ക്കെതിരേയും കര്‍ശ്ശനമായ നടപടികള്‍ സ്വീകരിച്ചില്ലെങ്കില്‍ തെന്മലയില്‍ ഊരുള്‍പൊട്ടല്‍ വീണ്ടും ഉണ്ടാകുവാന്‍ സാധ്യതയുണ്ടെന്ന പരിസ്ഥിതി സംഘടനകള്‍ മുന്നറിയിപ്പുനല്‍കുന്നു.
റവന്യൂ, തദ്ദേശ സ്ഥാപനം, ജിയോളജി എന്നീ വകുപ്പുകള്‍ക്ക് മുതലമട, കൊല്ലങ്കോട്, എലവഞ്ചേരി പ്രദേശങ്ങളിലെ അനധികൃത ക്വാറികളുടെ പ്രവര്‍ത്തനങ്ങള്‍ക്കെതിരെ നടപടിയെടുക്കാതിരിക്കുന്നത് വന്‍തോതിലുള്ള പാരിസ്ഥിതിക ആഘാതങ്ങള്‍ക്ക് വഴിവെക്കുമെന്നതിനാല്‍ അടിയന്തിരമായി പാറഖനനങ്ങള്‍ക്കെതിരേയും മണ്ണ്ഖനനത്തനെതിരേയും നടപടിശക്തമാക്കണമെന്നാണ് നാട്ടുകാരുടെ ആവശ്യം.