തളിപ്പറമ്പ് : പറശ്ശിനിക്കടവ് കമ്പില്‍ക്കടവില്‍ വന്‍ തീപിടുത്തം. ഏക്കറുകണക്കിന് വയല്‍ കത്തിനശിച്ചു. ഇന്നലെ ഉച്ചക്ക് 12മണിയോടെ ആയിരുന്നു സംഭവം. കനാലിന് വലതുവശത്തുനിന്നുമാണ് ആദ്യം തീ പടര്‍ന്നത്. ഉടന്‍തന്നെ സമീപവാസികളും നാട്ടുകാരും ചേര്‍ന്ന് തീഅണയ്ക്കാന്‍ തുടങ്ങി. അതുവഴി പട്രോളിങ് നടത്തുകയായിരുന്ന തളിപ്പറമ്പ് അഡി. എസ്.ഐ കെ മോഹനന്‍ ഫയര്‍‌സ്റ്റേഷനില്‍ വിവരമറിയിച്ചതനുസരിച്ച് ഫയര്‍ഫോഴ്‌സ് എത്തുമ്പോഴേക്കും കൂടുതല്‍ സ്ഥലത്തേക്ക് തീ പടര്‍ന്നിരുന്നു. ശക്തമായ ചൂടും കാറ്റും തീ വേഗത്തില്‍ പടരാന്‍ കാരണമായി. വയല്‍ക്കരയിലെ നിരവധി തെങ്ങുകളും, പച്ചക്കറികളും കത്തി നശിച്ചു. ഒടുവില്‍ നാട്ടുകാരുടെ സഹായത്തോടെ ഏറെ പണിപ്പെട്ടാണ് ഫയര്‍ഫോഴ്‌സ് തീയണച്ചത്.