കാസര്‍കോട്: ഓട്ടോഡ്രൈവര്‍ അബ്ദുള്‍ സത്താര്‍ ആത്മഹത്യ ചെയ്ത സംഭവത്തില്‍ ആരോപണ വിധേയനായ എസ്.ഐ അനൂപിന് സസ്പെന്‍ഷന്‍. അനൂപ് സമാനമായ അതിക്രമങ്ങള്‍ മുമ്പും നടത്തിയതായി പരാതികള്‍ ലഭിച്ചതിനെ തുടര്‍ന്നാണ് സസ്പെന്‍ഷന്‍. മറ്റൊരു ഓട്ടോ ഡ്രൈവറെ എസ.ഐ കയ്യേറ്റം ചെയ്യുന്നതിന്റെ ദൃശ്യങ്ങള്‍ പുറത്തുവന്നിരുന്നു.

ഓട്ടോ ഡ്രൈവറായ നൗഷാദിനെ അനൂപ് മര്‍ദ്ദിക്കുന്ന ദൃശ്യങ്ങളാണ് പുറത്ത് വന്നത്. കഴിഞ്ഞ ജൂണില്‍ നടന്ന സംഭവത്തിന്റെ ദൃശ്യങ്ങളാണ് ഇപ്പോള്‍ പുറത്ത് വന്നിരിക്കുന്നത്. നൗഷാദിന്റെ വസ്ത്രത്തില്‍ കുത്തിപ്പിടിച്ച എസ്ഐ, ബലം പ്രയോഗിച്ച് വണ്ടിയില്‍ കയറ്റാന്‍ ശ്രമിക്കുന്നതായിരുന്നു ദൃശ്യത്തിലുണ്ടായിരുന്നത്. വണ്ടിയില്‍ കയറാന്‍ പറഞ്ഞാല്‍ കയറിയാല്‍ മതിയെന്നും കൂടുതലൊന്നും പറയേണ്ടെന്നും എസ് ഐ പറയുന്നുണ്ട്. 

ദിവസങ്ങള്‍ക്ക് മുമ്പ് കാസര്‍കോട് നഗരത്തിലുണ്ടായ ഗതാഗതക്കുരുക്കില്‍ തന്റെ ഓട്ടോറിക്ഷ കുടുങ്ങിയെന്നും കാസര്‍കോട് ടൗണ്‍ പൊലിസ് സ്റ്റേഷനിലെ എസ്.ഐ പി. അനൂപ് ഓട്ടോയുടെ താക്കോല്‍ ഊരി കൊണ്ടുപോയെന്നും പിന്നീട് പലതവണ സ്റ്റേഷനില്‍ ചെന്നപ്പോള്‍ മനോവിഷമം ഉണ്ടാക്കുന്ന തരത്തില്‍ പെരുമാറിയതല്ലാതെ ഓട്ടോ വിട്ടുതന്നില്ലെന്നും മരിക്കുന്നതിന് മുമ്പ് സമൂഹമാധ്യമത്തിലിട്ട വീഡിയോയില്‍ അബ്ദുല്‍സത്താര്‍ പറഞ്ഞിരുന്നു.

സംഭവത്തില്‍ ക്രൈംബ്രാഞ്ച് ഡി.വൈ.എസ്.പി ഉത്തംദാസിന്റെ നേതൃത്വത്തില്‍ അന്വേഷണം നടക്കുന്നുണ്ട്. ഈ സംഭവത്തില്‍ എസ്.ഐ അനൂപിനേയും ഓട്ടോറിക്ഷ തടഞ്ഞ ഹോം ഗാര്‍ഡിനേയും അന്ന് തന്നെ സ്ഥലം മാറ്റിയിരുന്നു.