ബംഗളൂരു: കര്‍ണാടക തെരഞ്ഞെടുപ്പിനോട് അനുബന്ധിച്ച് വര്‍ഗീയ പ്രചാരണം നടത്തി പ്രധാനമന്ത്രി നരേന്ദ്ര മോദി. ടിപ്പു സുല്‍ത്താന്‍ ജയന്തി ആഘോഷിച്ച് കോണ്‍ഗ്രസ് കര്‍ണാടകയിലെ ജനങ്ങളെ അപമാനിക്കുകയാണെന്ന് മോദി പറഞ്ഞു.
ചിത്രദുര്‍ഗയില്‍ നടന്ന തെരഞ്ഞെടുപ്പ് റാലിയോടനുബന്ധിച്ച് പ്രവര്‍ത്തകരെ അഭിസംബോധം ചെയ്യുകയായിരുന്നു അദ്ദേഹം. സുല്‍ത്താന്മാരുടെ ജന്മ ദിനം കോണ്‍ഗ്രസ് ആഘോഷിക്കുന്നത് വോട്ട് ലക്ഷ്യംവച്ചാണ്. സമൂഹത്തെ ഭിന്നിപ്പിക്കുകയെന്ന ലക്ഷ്യംവച്ച് കോണ്‍ഗ്രസ് ചരിത്രം വളച്ചൊടിക്കുകയാണ്. നവംബര്‍ പത്തിന് ടിപ്പു ജിയന്തി ആഘോഷിക്കാനുള്ള കര്‍ണാടക സര്‍ക്കാരിന്റെ തീരുമാനത്തെ വിമര്‍ശിക്കുകയായിരുന്നു മോദി. കോണ്‍ഗ്രസിന്റെ രീതികള്‍ നോക്കൂ. ആരുടെ ജയന്തിയാണ് നമ്മള്‍ ബഹുമാനത്തോടെ ആഘോഷിക്കേണ്ടത്. ഇക്കാര്യം കോണ്‍ഗ്രസ് ചിന്തിക്കുന്നില്ല. വീര മദകരി, ഒനാക ഒബ്ബാവ എന്നിവരെ അവര്‍ മറന്നു. പക്ഷെ വോട്ട് ബാങ്ക് ലക്ഷ്യമാക്കി ടിപ്പു ജയന്തി ആഘോഷിക്കുന്നവെന്ന് മോദി പറഞ്ഞു.
എന്നാല്‍ മോദിയുടെ വര്‍ഗീയ പരാമര്‍ശങ്ങളെ മുഖ്യമന്ത്രി സിദ്ധരാമയ്യ ശക്തമായി വിമര്‍ശിച്ചു. വ്യക്തിപരമായ ആക്രമണവും തരംതാണ വാക്കുകളുമാണ് മോദി ഉപയോഗിക്കുന്നതെന്ന് സിദ്ധരാമയ്യ കുറ്റപ്പെടുത്തി. പ്രധാനമന്ത്രിയുടെ പദവിക്ക് അനുയോജ്യമല്ലാത്ത വാക്കുകളാണ് മോദിയില്‍ നിനിന്നുവരുന്നത്. കര്‍ണാടകയില്‍ ബി.ജെ.പി മോദിയെ മാത്രം ആശ്രയിച്ച് കഴിയുകയാണെന്നും അവര്‍ക്ക് ഉയര്‍ത്തിക്കാട്ടാനായി മറ്റൊരു നേതാവില്ലെന്നും സിദ്ധരാമയ്യ പറഞ്ഞു.
മോദിയില്‍ പ്രതീക്ഷിക്കുന്നത് മാന്യമായ ഭാഷയാണ്. പക്ഷെ അദ്ദേഹം സംസാരിക്കുന്നത് ബി.ജെ.പിയുടെ ഭാഷയിലാണ്. സംസ്‌കാരിമില്ലാത്തവരുടെ വാക്കുകള്‍ ഉപയോഗിക്കുന്നു. ഇത് ഒരു പ്രധാനമന്ത്രിയുടെ ഭാഷയല്ലെന്നും അദ്ദേഹം മാധ്യമങ്ങളോട് പറഞ്ഞു.