കൊച്ചി: കായലില്‍ മരിച്ചനിലയില്‍ കണ്ടെത്തിയ സി.എ വിദ്യാര്‍ഥി മിഷേല്‍ ഷാജിയുടെ മരണത്തില്‍ അറസ്റ്റിലായ ബന്ധുവിനെതിരേ കേസെടുത്തു. ആത്മഹത്യാപ്രേരണയ്ക്കാണ് കേസെടുത്തത്. പിറവം സ്വദേശിയായ ക്രോണിന്‍ അലക്‌സാണ്ടര്‍ ബേബിയാണ് അറസ്റ്റിലായിരിക്കുന്നത്. മിഷേലുമായി ഇയാള്‍ക്ക് രണ്ടു വര്‍ഷമായി അടുപ്പമുണ്ടായിരുന്നതായും പൊലിസ് പറഞ്ഞു.

ആത്മഹത്യ ഇയാളുടെ നിരന്തരമായ സമ്മര്‍ദ്ദം മൂലമാണെന്ന് പൊലിസ് പറഞ്ഞു. ആത്മഹത്യയ്ക്ക് കാരണം, അടുപ്പത്തിലെ അസ്വാരസ്യങ്ങളാണെന്നും ഇയാള്‍ പൊലിസിനോട് പറഞ്ഞു. പെണ്‍കുട്ടിയെ കാണാതാകുന്നതിന്റെ തലേ ദിവസം ക്രാണിന്‍ 57 തവണ മിഷേലിന്റെ ഫോണിലേക്ക് മെസ്സേജ് അയച്ചിരുന്നു. കൂടാതെ നാലു തവണ വിളിക്കുകയും ചെയ്തു. അഞ്ചാം തിയ്യതി ആറു തവണ വിളിക്കുകയും 32 മെസ്സേജുകള്‍ അയയ്ക്കുകയും ചെയ്തതായി ഇയാള്‍ പൊലിസിനോട് പറഞ്ഞു. ഇയാള്‍ ഒരിക്കല്‍ മിഷേലിനെ മര്‍ദ്ദിച്ചതായും മിഷേലിന്റെ കൂട്ടുകാരി മൊഴി നല്‍കിയിട്ടുണ്ട്.