ഇന്ത്യന്‍ വെല്‍സ്: ലോക രണ്ടാം നമ്പര്‍ താരം സെര്‍ബിയയുടെ നൊവാക് ദ്യോക്കോവിച്, മുന്‍ ലോക ഒന്നാം നമ്പര്‍ താരങ്ങളായ സ്‌പെയിനിന്റെ റാഫേല്‍ നദാല്‍ സ്വിസ് ഇതിഹാസം റോജര്‍ ഫെഡറര്‍ എന്നിവര്‍ ഇന്ത്യന്‍ വെല്‍സ് ടെന്നീസ് ചാംപ്യന്‍ഷിപ്പിന്റെ മൂന്നാം റൗണ്ടില്‍ കടന്നു.
രണ്ടു സെറ്റ് പോരാട്ടത്തില്‍ കെയ്ല്‍ എഡ്മണ്ടിനെ പരാജയപ്പെടുത്തിയാണു ദ്യോക്കോവിച് മുന്നേറിയത്. സ്‌കോര്‍: 6-4, 7-6 (7-5). മൂന്നാം റൗണ്ടില്‍ അര്‍ജന്റീന താരം യുവാന്‍ മാര്‍ടിന്‍ ഡെല്‍ പോട്രോയാണു എതിരാളി.
അര്‍ജന്റീനയുടെ ഗ്വിഡോ പെല്ലയെ നേരിട്ടുള്ള സെറ്റുകള്‍ക്ക് കീഴടക്കിയാണു സ്പാനിഷ് താരമായ നദാലിന്റെ മുന്നേറ്റം. സ്‌കോര്‍: 6-3, 6-2. സ്വന്തം നാട്ടുകാരനായ ഫെര്‍ണാണ്ടോ വെര്‍ഡെസ്‌കോയാണ് മൂന്നാം റൗണ്ടില്‍ നദാലിന്റെ എതിരാളി.
ഫ്രാന്‍സിന്റെ സ്റ്റെഫാനെ റോബര്‍ട്ടിനെ പരാജയപ്പെടുത്തിയാണു റോജര്‍ ഫെഡറര്‍ വിജയിച്ചത്. രണ്ടു സെറ്റു മാത്രം നീണ്ട പോരില്‍ 6-2, 6-1 എന്ന സ്‌കോറിനു ഫെഡ് ജയിച്ചു കയറി.