വടക്കാഞ്ചേരി: പട്ടണത്തിന്റെ മുക്കും മൂലയും മാലിന്യം നിറഞ്ഞു ചീഞ്ഞു നാറുന്നു. മാലിന്യ നിര്‍മാര്‍ജനം നഗരഹൃദയത്തില്‍ മാത്രം ഒതുങ്ങുമ്പോള്‍ ഉള്‍പ്രദേശങ്ങളിലെ സ്ഥിതി ദയനീയമാണ്.
നഗരത്തോടു ചേര്‍ന്ന പാലസ് റോഡിലും എംപ്ലോയ്‌മെന്റ് എക്‌സ്‌ചേഞ്ച് പരിസരത്തും മാലിന്യ കൂമ്പാരമാണ്. ഇങ്ങോട്ടു നഗരസഭയുടെ മാലിന്യവണ്ടി എത്താത്തതാണു പ്രശ്‌നം. മാലിന്യം കുന്നുകൂടി കിടക്കുന്നതിനാല്‍ തെരുവു നായ്ക്കളും കാക്കകളും മറ്റു പക്ഷികളുമൊക്കെ ഇതു കൊത്തിവലിച്ചു നാടാകെ പരത്തുന്നു.
സമീപത്തെ ജലാശയങ്ങളിലും കിണറുകളിലുമൊക്കെ കൊണ്ടു വന്നിടുന്നതായും പരാതിയുണ്ട്. നഗരത്തോടൊപ്പം ഉള്‍പ്രദേശങ്ങളില്‍ നിന്നും മാലിന്യ നിര്‍മാര്‍ജനം നടത്തണമെന്നാണു ജനങ്ങളുടെ ആവശ്യം.
എന്നാല്‍ നഗരസഭ ഇതിനു തയാറാകുന്നില്ലെന്ന പരാതിയും ജനങ്ങള്‍ക്കുണ്ട്. മാലിന്യം നിക്ഷേപിയ്ക്കരുതെന്ന മുന്നറിയിപ്പ് ബോര്‍ഡിനു താഴെ വരെ മാലിന്യ നിക്ഷേപം നടത്തുന്നവരാണു നഗരത്തെ മാലിന്യത്താല്‍ നിറയ്ക്കുന്നതെന്ന വസ്തുതയും നിലനില്‍ക്കുന്നു.