പുല്‍പ്പള്ളി: തുടര്‍ച്ചയായി ലഭിച്ച വേനല്‍മഴ കുടിയേറ്റമേഖലയ്ക്ക് ആശ്വാസമാകുന്നു.
രൂക്ഷമായ വരള്‍ച്ചയും കുടിവെള്ളക്ഷാമവുംമൂലം പ്രതിസന്ധിയിലായിരുന്ന കര്‍ഷകര്‍ക്ക് അപ്രതീക്ഷിതമായി ലഭിച്ച വേനല്‍മഴ പുത്തനുണര്‍വാണ് നല്‍കുന്നത്. ഏപ്രില്‍ ആദ്യവാരത്തില്‍ നടേണ്ടിയിരുന്ന ഇഞ്ചി, ചേന, കൃഷികള്‍ മഴ ലഭിച്ചതോടെ നടീലിന്റെ തിരക്കിലാണ് കര്‍ഷകര്‍. തുടര്‍ച്ചയായി മഴ ലഭിച്ചതിനാല്‍ കിണറുകളില്‍ ജലനിരപ്പ് ഉയര്‍ന്നിട്ടുണ്ട്. വരള്‍ച്ചയും ദ്രുതവാട്ടവും മൂലം കൃഷി നശിച്ച കുരുമുളക് വീണ്ടും കൃഷി ചെയ്യാനുള്ള തയാറെടുപ്പിലാണ് കര്‍ഷകര്‍. കൃഷിക്കാവശ്യമായ തൈകള്‍ സ്വന്തമായി വീടുകളില്‍ ഉല്‍പ്പാദിപ്പിച്ചാണ് ഭൂരിഭാഗം കര്‍ഷകരും കൃഷി ചെയ്യുന്നത്. പന്നിയൂര്‍, കരിമുണ്ട, ജീരകമുണ്ടി തുടങ്ങിയ കുരുമുളക് തൈകള്‍ക്ക് പുറമെ കാപ്പി, റബര്‍ തൈകളും നടാനുള്ള തിരക്കിലാണ് കര്‍ഷകര്‍. അന്യസംസ്ഥാനങ്ങളില്‍ നിന്ന് കൊണ്ടു വരുന്ന കൂടതൈകള്‍ക്ക് ആവശ്യക്കാരാറെയുണ്ടെങ്കിലും നാടന്‍ തൈകള്‍ക്കാണ് പ്രിയം.