മട്ടന്നൂര്‍: എസ്.ഡി.പി.ഐ പ്രവര്‍ത്തകനെ വെട്ടിപ്പരുക്കേല്‍പ്പിച്ച സംഭവത്തില്‍ അഞ്ച് സി.പി.എം പ്രവര്‍ത്തകര്‍ക്കെതിരേ മട്ടന്നൂര്‍ പൊലിസ് കേസെടുത്തു. അക്രമത്തില്‍ പ്രതിഷേധിച്ച് എസ്.ഡി.പി.ഐ ഇരിട്ടി മണ്ഡലം കമ്മിറ്റി 19ാംമൈല്‍ മുതല്‍ ഉളിയില്‍ വരെ ഹര്‍ത്താല്‍ ആചരിച്ചു. ബുധനാഴ്ച രാത്രിയാണ് നിസ്‌കാരം കഴിഞ്ഞ് വീട്ടിലേക്കു പോകുന്നവഴി എസ്.ഡി.പി.ഐ പ്രവര്‍ത്തകന്‍ ചാവശ്ശേരി പുതിയപുരയില്‍ മൈക്കൂട്ട് സാജീറി(21)നെ ഒരു സംഘം സി.പി.എം പ്രവര്‍ത്തകര്‍ വെട്ടിപ്പരുക്കേല്‍പ്പിച്ചത്. സാജിറിനെ കോഴിക്കോട് മിംസ് ആശുപത്രിയില്‍ പ്രവേശിപ്പിച്ചു. ചാവശ്ശേരി മിനി സ്റ്റേഡിയത്തിനടുത്ത് ക്രിക്കറ്റ് കളിയുമായി ബന്ധപ്പെട്ടുണ്ടായ തര്‍ക്കത്തിനിടയില്‍ സി.പി.എം പ്രവര്‍ത്തകന് കുത്തേറ്റിരുന്നു. ഇതിന്റെ പ്രതികാരമായാണ് സാജിറിനു നേരെയുള്ള ആക്രമണമെന്നു പറയപ്പെടുന്നു. അക്രമ സ്ഥലം എസ്.പി സഞ്ജയ്കുമാര്‍ ഗുര്‍ദീന്‍ സന്ദര്‍ശിച്ചു.