ന്യൂഡല്‍ഹി: ഗോവയില്‍ മനോഹര്‍ പരീക്കറുടെ സത്യപ്രതിജ്ഞ സ്റ്റേ ചെയ്യണമെന്ന കോണ്‍ഗ്രസിന്റെ ആവശ്യം സുപ്രിംകോടതി തള്ളി. നിയമസഭയില്‍ വിശ്വാസ വോട്ടെടുപ്പ് നടത്തണമെന്ന് സുപ്രിംകോടതി ആവശ്യപ്പെട്ടു. ചീഫ് ജസ്റ്റീസ് ജെ.എസ്.ഖെഹാര്‍ അധ്യക്ഷനായ മൂന്നംഗ ബഞ്ചാണ് കോണ്‍ഗ്രസിന്റെ അവശ്യം തള്ളിയത്.

സഭയിലെ മുതിർന്ന അംഗത്തെ പ്രോട്ടെം സ്പീക്കറാക്കി വോട്ടെടുപ്പ് നടത്താനാണ് കോടതി നിർദേശം. പരീക്കറുടെ സത്യപ്രതിജ്ഞയ്ക്ക് തടസ്സമുണ്ടാവില്ല. ഇന്നു വൈകിട്ട് നാലിന് രാജ്ഭവനിലാണ് മനോഹർ പരീക്കറിന്റെ സത്യപ്രതിജ്ഞാ ചടങ്ങ് നിശ്ചയിച്ചിരിക്കുന്നത്.

ഗോവയില്‍ സര്‍ക്കാര്‍ രൂപീകരിക്കാനുള്ള കേവല ഭൂരിപക്ഷം കോണ്‍ഗ്രസിനുണ്ടോയെന്ന് വാദത്തിനിടെ സുപ്രിംകോടതി ആരാഞ്ഞു. അങ്ങനെയുണ്ടെന്ന് തെളിയിച്ചാല്‍ ബിജെപിയെ സര്‍ക്കാര്‍ രൂപീകരിക്കാന്‍ ക്ഷണിച്ച ഗവര്‍ണറുടെ നടപടി റദ്ദ് ചെയ്യും. കേവല ഭൂരിപക്ഷം ഉണ്ടെന്ന് കോടതിയെ ബോധ്യമാക്കാത്ത പക്ഷം മറ്റ് വാദങ്ങള്‍ പ്രസക്തമല്ലെന്നും കോടതി നിരീക്ഷിച്ചു. തുടര്‍ന്നാണ് വിശ്വാസവോട്ടെടുപ്പ്  നടത്തണമെന്ന് കോടതി ആവശ്യപ്പെട്ടത്.

 ഗോവയില്‍ 17 സീറ്റുകള്‍ നേടിയ കോണ്‍ഗ്രസാണ് ഏറ്റവും വലിയ ഒറ്റക്കക്ഷിയെന്നും കുതിരക്കച്ചവടത്തിലൂടെ ബിജെപി അധികാരം പിടിച്ചെടുക്കാന്‍ ശ്രമിക്കുന്നുവെന്നുമായിരുന്നു ഹരജിയിലെ പരാതി. ഏറ്റവും വലിയ ഒറ്റക്കക്ഷിയായ കോണ്‍ഗ്രസിനെ സര്‍ക്കാരുണ്ടാക്കാന്‍ ക്ഷണിക്കാതെ ബിജെപിയെ ക്ഷണിച്ച ഗവര്‍ണര്‍ മൃദുല സിന്‍ഹയുടെ നടപടി നിയമവിരുദ്ധമാണെന്നും ഹരജിയില്‍ ചൂണ്ടിക്കാണിച്ചിരുന്നു.