യരേവാന്‍: സര്‍ക്കാര്‍ വിരുദ്ധ പ്രക്ഷോഭത്തിനൊടുവില്‍ പ്രതിപക്ഷ നേതാവ് നിക്കോള്‍ പഷ്‌നിയനെ അര്‍മേനിയന്‍ പ്രധാനമന്ത്രിയായി തെരഞ്ഞെടുത്തു. പ്രധാനമന്ത്രി സെര്‍ഷ് സെര്‍ജിസിയാന്‍ രാജിവച്ച് രണ്ടാഴ്ച പിന്നിടുന്നതിനിടെയാണ് പഷ്‌നിയനെ തെരഞ്ഞെടുത്തത്.

'വെല്‍വറ്റ് വിപ്ലവം' എന്ന പേരില്‍ പഷ്‌നിയനാണ് സര്‍ക്കാരിനെതിരെ ജനങ്ങളെ തെരുവിലിറക്കിയത്. മാര്‍ച്ച് 31ന് തുടങ്ങിയ അക്രമരഹിത മാര്‍ച്ചോടെയായിരുന്നു ഇതിന്റെ തുടക്കം.

മുന്‍ പത്രാധിപനായ പഷ്‌നിയന്‍, സര്‍ക്കാരിനെതിരെ കലാപം ഉണ്ടാക്കിയെന്ന കേസില്‍ ജയിലിലായിരുന്നു. 1990 ന്റെ അവസാനം മുതല്‍ തുടരുന്ന കേഡര്‍ ഭരണത്തിനെതിരെയാണ് പഷ്‌നിയന്റെ നേതൃത്വത്തില്‍ പ്രക്ഷോഭം ആരംഭിച്ചത്.

രാജ്യത്തുണ്ടായിരുന്ന സ്വജനപക്ഷപാതവും, പ്രഭുത്വ ഭരണവും ഇല്ലാതാക്കുമെന്നും യുവാക്കള്‍ക്ക് പ്രാതിനിധ്യമുള്ള ഭരണമായിരിക്കുമെന്നും പഷ്‌നിയന്‍ പ്രഖ്യാപിച്ചു.

പാര്‍ലമെന്റില്‍ 59 അംഗങ്ങളുടെ പിന്തുണയോടെയാണ് പഷ്‌നിയന്‍ പ്രധാനമന്ത്രിയായി തെരഞ്ഞെടുക്കപ്പെട്ടത്. ഇതില്‍ ഭരണകക്ഷി അംഗങ്ങളും ഉണ്ട്. 42 പേരാണ് എതിര്‍ത്തു വോട്ടു ചെയ്തത്.

പഷ്‌നിയനെ തെരഞ്ഞെടുക്കുന്ന ദൃശ്യങ്ങള്‍ കാണാന്‍ ഫ്രീഡം ചത്വരത്തില്‍ നിരവധി ആളുകളാണ് എത്തിയത്. കൂറ്റന്‍ സ്‌ക്രീനില്‍ എല്ലാം ലൈവായി കാണിക്കുമ്പോള്‍ ''നിക്കോള്‍'' എന്ന് കൂടെക്കൂടെ പറയുന്നുണ്ടായിരുന്നു.