ശ്രീനഗര്‍: റമദാനും അമര്‍നാഥ് യാത്രയും പ്രമാണിച്ച് കശ്മിരില്‍ ഒരു മാസം തീവ്രവാദികളുമായി വെടിനിര്‍ത്തല്‍ പ്രഖ്യാപിക്കണമെന്ന് സര്‍വകക്ഷി യോഗം. ഇക്കാര്യം ആവശ്യപ്പെട്ട് പ്രധാനമന്ത്രിയെ കാണുമെന്ന് മുഖ്യമന്ത്രി മെഹബൂബ മുഫ്തി അറിയിച്ചു. സര്‍വകക്ഷി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അവര്‍.

വിനോദ യാത്രക്കെത്തിയ ആള്‍ കല്ലേറില്‍ കൊല്ലപ്പെട്ട സംഭവത്തിന്റെ പശ്ചാത്തലത്തിലാണ് മെഹ്ബൂബ മുഫ്തി സര്‍വ്വകക്ഷി യോഗം വിളിച്ചത്.

കുടുംബത്തോടൊപ്പം അവധി ആഘോഷിക്കാന്‍ കശ്മീരിലെത്തിയ തമിഴ്‌നാട് സ്വദേശിയാണ് കൊല്ലപ്പെട്ടത്. സുരക്ഷാ സേനയും പ്രതിഷേധക്കാരും തമ്മിലുണ്ടായ സംഘര്‍ഷത്തിനിടെ ഇയാള്‍ക്ക് കല്ലേറില്‍ പരുക്കേല്‍ക്കുകയായിരുന്നു.

''ചെറിയ മക്കള്‍ അവരുടെ മാതാപിതാക്കളോട് പറയുന്നത്, ഞങ്ങള്‍ ഏറ്റുമുട്ടാന്‍ പോയിക്കോട്ടേയെന്നാണ്. എങ്ങനെയാണ് ഈ സാഹചര്യം മെച്ചപ്പെടുത്തുകയെന്നാണ് എനിക്ക് ചോദിക്കാനുള്ളത്. ഒരു സര്‍ക്കാരെന്ന നിലയ്ക്ക്, അടുത്ത തലമുറയുടെ ജീവിതം മെച്ചപ്പെടുത്താന്‍ നമ്മളൊരു പരിഹാരം കണ്ടെത്തേണ്ടതുണ്ട്''- മെഹ്ബൂബ യോഗത്തില്‍ പറഞ്ഞു.