വടകര: വള്ളിക്കാട് സിപിഎം പ്രകടനത്തിനിടെ പൊലിസിനുനേരെ അക്രമം.  ഇന്നലെ രാത്രി ഏഴര മണിയോടെയാണ് സംഭവം. നിരന്തരം അക്രമങ്ങളുണ്ടാകുന്ന വള്ളിക്കാട് പ്രദേശത്ത് സമാധാനം സ്ഥാപിക്കാന്‍ എല്ലാ രാഷ്ട്രീയ പാര്‍ട്ടികളുടെയും കൊടിതോരണങ്ങളും ബോര്‍ഡുകളും എടുത്തുമാറ്റാന്‍ പൊലിസ് തീരുമാനിച്ചിരുന്നു.
ഇതിന്റെ അടിസ്ഥാനത്തില്‍ കഴിഞ്ഞ ദിവസം രാത്രി വടകര എസ്‌ഐ ബോര്‍ഡുകള്‍ നീക്കം ചെയ്തിരുന്നു. ഇതിനിടയില്‍ സിപിഎം പ്രവര്‍ത്തകരും പൊലിസും തമ്മില്‍ വാക്കേറ്റമുണ്ടായിരുന്നു. ഇതില്‍ പ്രതിഷേധിച്ചാണ് ഇന്നലെ സിപിഎം പ്രവര്‍ത്തകര്‍ പ്രകടനം നടത്തിയത്. അപ്പോള്‍ സ്ഥലത്തുണ്ടായിരുന്ന ആര്‍.എം.പി പ്രവര്‍ത്തകരും സിപിഎം പ്രവര്‍ത്തകരും തമ്മില്‍ വാക്കേറ്റമുണ്ടാവുകയും ചെയ്തു.
   ഇതറിഞ്ഞ് സ്ഥലത്തെത്തിയ പൊലിസ് വാഹനത്തിനു നേരെ അക്രമം അഴിച്ചുവിടുകയായിരുന്നു.
   അക്രമത്തില്‍ പൊലിസ് ജീപ്പിന്റെ ചില്ലുകള്‍ തകരുകയും പിന്നിലെ വാതില്‍ അടിച്ചുതകര്‍ക്കുകയും ചെയ്തു. സംഭവത്തില്‍ കണ്ടാലറിയാവുന്ന സിപിഎം പ്രവര്‍ത്തകരായ  നാല്‍പതോളം പേര്‍ക്കെതിരേ കേസെടുത്തതായി എസ്‌ഐ ജിജീഷ് അറിയിച്ചു.