കോഴിക്കോട്: ആദിവാസികള്‍ക്കെതിരേ പോക്‌സോ നിയമം നടപ്പാക്കുന്നതില്‍ പ്രതിഷേധിച്ച് സമരം നടത്തുമെന്ന് ലോക് ജനശക്തി പാര്‍ട്ടി. പോക്‌സോ നിയമത്തില്‍ അകപ്പെട്ട  മുഴുവന്‍ ആദിവാസി കുടുംബങ്ങള്‍ക്കും നഷ്ടപരിഹിരം നല്‍കുക, സൗജന്യ നിയമ സഹായം അനുവദിക്കുക തുടങ്ങിയ ആവശ്യങ്ങളുന്നയിച്ച് കല്‍പ്പറ്റ കലക്ട്രേറ്റിനു മുന്നില്‍ 48 മണിക്കൂര്‍ ധര്‍ണ നടത്തുമെന്നും നേതാക്കള്‍ വാര്‍ത്താ സമ്മേളനത്തില്‍ അറിയിച്ചു. ആദിവാസികള്‍ക്കെതിരേ 41ഓളം കേസുകള്‍ പോക്‌സോ പ്രകാരം എടുത്തിട്ടുണ്ട്. ആദിവാസി ഗോത്രപാരമ്പര്യ ആചാരങ്ങളുടെ പേരിലാണ് പലപ്പോഴും പോക്‌സോപോലുള്ള നിയമങ്ങളില്‍ ഇവര്‍ പെടുന്നത്.
വിഷയത്തില്‍ സര്‍ക്കാര്‍ ഉടന്‍ ഇടപെട്ട് പരിഹാരമുണ്ടാക്കണമെന്നാവശ്യപ്പെട്ട് ഒപ്പുശേഖരണം നടത്തി കേന്ദ്രമന്ത്രിക്കും കേരള മന്ത്രിക്കും നല്‍കുമെന്നും ലോക് ജനശക്തി നേതാക്കള്‍ പറഞ്ഞു.