കൊല്‍ക്കത്ത: ഐ.പി.എല്ലില്‍ സ്വന്തം തട്ടകത്തില്‍ കൊല്‍ക്കത്ത നൈറ്റ് റൈഡേഴ്‌സിന് ദയനീയ പരാജയം. മുംബൈ ഇന്ത്യന്‍സ് അവരെ 102 റണ്‍സിന്റെ നാണംകെട്ട തോല്‍വിയിലേക്ക് തള്ളിയിട്ടു. ആദ്യം ബാറ്റ് ചെയ്ത മുംബൈ നിശ്ചിത 20 ഓവറില്‍ ആറ് വിക്കറ്റ് നഷ്ടത്തില്‍ 210 റണ്‍സെന്ന മികച്ച സ്‌കോര്‍ പടുത്തുയര്‍ത്തിയപ്പോള്‍ കൊല്‍ക്കത്തയുടെ പോരാട്ടം 18.1 ഓവറില്‍ 108 റണ്‍സില്‍ അവസാനിച്ചു.
കൂറ്റന്‍ ലക്ഷ്യത്തിലേക്ക് ബാറ്റേന്തിയ കൊല്‍ക്കത്ത ഒരു ഘട്ടത്തില്‍ പോലും വിജയ പ്രതീക്ഷ പ്രകടിപ്പിച്ചില്ല. 21 വീതം റണ്‍സെടുത്ത ക്രിസ് ലിന്‍, നിതീഷ് റാണ എന്നിവര്‍ മാത്രമാണ് അല്‍പം പിടിച്ചുനിന്നത്. മുംബൈ ബൗളര്‍മാര്‍ കണിശതയോടെ പന്തെറിഞ്ഞപ്പോള്‍ ഫീല്‍ഡര്‍മാരും മികവ് പുലര്‍ത്തി. ഹര്‍ദിക്, ക്രുണാല്‍ പാണ്ഡ്യ സഹോദരന്‍മാര്‍ രണ്ട് വിക്കറ്റെടുത്തു.
ടോസ് നേടി ബൗളിങ് തിരഞ്ഞെടുത്ത കൊല്‍ക്കത്ത നായകന്‍ ദിനേഷ് കാര്‍ത്തികിന്റെ തീരുമാനം തെറ്റാണെന്ന് യുവ താരം ഇഷാന്‍ കിഷന്‍ ശരിക്കും ബോധ്യപ്പെടുത്തി. 21 പന്തില്‍ ആറ് സിക്‌സും അഞ്ച് ഫോറും സഹിതം താരം ക്ഷണത്തില്‍ അടിച്ചെടുത്ത 62 റണ്‍സിന്റെ ശക്തമായ അടിത്തറയിലാണ് മുംബൈ മികച്ച സ്‌കോര്‍ സ്വന്തമാക്കിയത്. 36 വീതം റണ്‍സെടുത്ത് സൂര്യകുമാര്‍ യാദവ്, ക്യാപ്റ്റന്‍ രോഹിത് ശര്‍മ എന്നിവരും തിളങ്ങി. ബെന്‍ കട്ടിങ് ഒന്‍പത് പന്തില്‍ മൂന്ന് സിക്‌സും ഒരു ഫോറും സഹിതം 24 റണ്‍സ് വാരി സ്‌കോര്‍ 200 കടത്തി. കൊല്‍ക്കത്തയ്ക്കായി പിയൂഷ് ചൗള മൂന്ന് വിക്കറ്റെടുത്തു. സുനില്‍ നരെയ്ന്‍ ഒഴികെയുള്ള കൊല്‍ക്കത്തന്‍ ബൗളര്‍മാരെല്ലാം ശരിക്കും തല്ല് വാങ്ങി.