ആലപ്പുഴ: അന്തരിച്ച പ്രമുഖ സംഗീതജ്ഞന്‍ സൂരജ് ബാലന്റെ (കണ്ണന്‍) ഓര്‍മ്മയ്ക്കായി ആലപ്പി ബീച്ച് ക്ലബ്ബ് സംഗീതനിശ സംഘടിപ്പിക്കുന്നു. ഏപ്രില്‍ രണ്ടിന് വൈകിട്ട് അഞ്ചിന് ആലപ്പുഴ ഇ.എം.എസ്. സ്‌റ്റേഡിയത്തില്‍ നടക്കുന്ന സംഗീത സായാഹ്നത്തില്‍ മലയാള സിനിമാരംഗത്തെ അമ്പതോളം പ്രതിഭകള്‍ പങ്കെടുക്കും.
എം. ജയചന്ദ്രന്‍, മോഹന്‍ സിത്താര, ദീപക് ദേവ്, രമേശ് നാരായണന്‍, ഗോപിസുന്ദര്‍ തുടങ്ങിയവര്‍ പങ്കെടുക്കും. പരിപാടിയോടനുബന്ധിച്ച് എ.ബി.സി ക്ലബ് വി. ദക്ഷിണാമൂര്‍ത്തി സ്വാമിയുടെ പേരില്‍ അരലക്ഷം രൂപയുടെ അവാര്‍ഡ് നല്‍കും.
അവാര്‍ഡ് നിര്‍ണയ കമ്മിറ്റിയില്‍ സംഗീത സംവിധായകരായ ബേണി ഇഗ്‌നേഷ്യസ്, ദീപക്‌ദേവ്, ഗോപീസുന്ദര്‍, ബിജിബാല്‍ എന്നിവര്‍ ജൂറി അംഗങ്ങളാണ്. വാര്‍ത്താസമ്മേളനത്തില്‍ ജനറല്‍ കണ്‍വീനര്‍ വി.ജി. വിഷ്ണു, സെക്രട്ടറി സി.വി. മനോജ്കുമാര്‍, ട്രഷറര്‍ എ. നാസര്‍, ഹരികുമാര്‍ വാലേത്ത്, കെ. ആനന്ദബാബു തുടങ്ങിയവര്‍ സംബന്ധിച്ചു.