അങ്ങാടിപ്പുറം: ഗ്രാമ പഞ്ചായത്തും കുടുംബശ്രീ ജില്ലാ മിഷനും സംയുക്തമായി സംഘടിപ്പിക്കുന്ന ജില്ലാതല  ഭക്ഷ്യമേള ഉമ്മാന്റെ വടക്കിനി നാളെ മുതല്‍ 19 വരെ അങ്ങാടിപ്പുറത്ത് നടക്കും. മേളയുടെ ഉദ്ഘാടനം നാളെ വൈകിട്ട് മൂന്നിന് ജില്ലാ മിഷന്‍ കോഡിനേറ്റര്‍  സി.കെ ഹേമലത നിര്‍വഹിക്കും. കഫേ  കുടുംബശ്രീയുടെ വിദഗ്ധ പരിശീലനം ലഭിച്ച ജില്ലയിലെ കഫേ യൂനിറ്റുകള്‍ തയാറാക്കുന്ന തനതായ  മായം കലരാത്ത വൈവിധ്യമാര്‍ന്ന ഭക്ഷണ പദാര്‍ഥങ്ങളുടെ പ്രദര്‍ശനവും വിപണനവും മേളയില്‍  ഉണ്ടായിരിക്കും.
കുടുംബശ്രീ വനിതകള്‍ ഉദ്പ്പാദിപ്പിക്കുന്ന വിഭവങ്ങള്‍ക്ക് വിപണി  കണ്ടെത്തുക, കലര്‍പ്പില്ലാത്തതും മായം കലരാത്തതും വൈവിധ്യവുമായ ഭക്ഷ്യ ഉല്‍പ്പന്നങ്ങള്‍ പൊതുജനങ്ങള്‍ക്ക്  ലഭ്യമാക്കുക എന്നതാണ് മേളയുടെ ഉദ്ദേശ്യം. ജില്ലയുടെ വിവിധ ഭാഗങ്ങളില്‍ നിന്നായി പതിമൂന്നോളം ഭക്ഷ്യ ഉത്പ്പാദന യൂനിറ്റുകള്‍ മേളയില്‍ പങ്കെടുക്കും. മേള 19ന് രാത്രി പത്തിന് സമാപിക്കും.