കോഴിക്കോട്: വീടിനു മുകളില്‍ ഭീഷണിയുയര്‍ത്തിയ തെങ്ങ് ഒടുവില്‍ മുറിച്ചുമാറ്റി. കൊടുവള്ളി ആവിലോറയില്‍ കോടതിയും ജില്ലാ കലക്ടറും തെങ്ങ് മുറിച്ചുമാറ്റാന്‍ ഉത്തരവിട്ടിട്ടും കീഴുദ്യോഗസ്ഥര്‍ പല കാരണം പറഞ്ഞ് നീട്ടിയതോടെ നാലു വര്‍ഷമായി തെങ്ങ് മുറിച്ചുകിട്ടാന്‍ ഓഫിസുകള്‍ കയറി ഇറങ്ങുന്ന യുവാവിനെ കുറിച്ച് കഴിഞ്ഞദിവസം സുപ്രഭാതം റിപ്പോര്‍ട്ട് ചെയ്തിരുന്നു.
പിറ്റേദിവസമാണ് കിഴക്കോത്ത് വില്ലേജ് ഓഫിസറുടെ നേതൃത്വത്തില്‍ സ്ഥലം ഉടമയുടെ ചെലവില്‍ തെങ്ങ് മുറിച്ചുമാറ്റിയത്. കൊടുവള്ളി ആവിലോറ തടായില്‍ മുഹമ്മദ് അഷ്‌റഫാണ് വര്‍ഷങ്ങളായി സര്‍ക്കാര്‍ ഓഫിസ് കയറിയിറങ്ങിയിരുന്നത്.
അയല്‍വാസിയായ പാറക്കുണ്ടത്തില്‍ ഷംസുദ്ദീന്റെ പറമ്പിലെ തെങ്ങ് മുറിച്ചുകിട്ടാന്‍ 2014 മെയ് 26 മുതല്‍ തുടങ്ങിയ നിയമപോരാട്ടത്തിനാണ് പരിസമാപ്തിയായത്. നാലു വര്‍ഷത്തിനിടെ ഗ്രാമപഞ്ചായത്തിലും ലീഗല്‍ അതോറിറ്റിയിലും വില്ലേജ് ഓഫിസിലും ആര്‍.ഡി.ഒക്കും ജില്ലാ കലക്ടര്‍ക്കും പരാതി നല്‍കിയിരുന്നു. തെങ്ങ് മുറിച്ചുമാറ്റന്‍ ആര്‍.ഡി.ഒയും ജില്ലാ കലക്ടറും ഉത്തരവിട്ടിട്ടും വില്ലേജ് അധികാരികള്‍ ചെവികൊണ്ടിരുന്നില്ല.
കഴിഞ്ഞദിവസം ജില്ലാ കലക്ടര്‍ വീണ്ടും ഉത്തരവിറക്കുകയായിരുന്നു. തുടര്‍ന്നാണ് നടപടിയുണ്ടായത്. ഉത്തരവു നടപ്പാക്കാത്ത ഉദ്യോഗസ്ഥര്‍ക്കെതിരേ സര്‍വിസ് ആക്ട് പ്രകാരം നടപടിയെടുക്കണമെന്ന് ആവശ്യപ്പെട്ട് അഷ്‌റഫ് കഴിഞ്ഞ ദിവസം ജില്ലാ കലക്ടറെ കണ്ടിരുന്നു.