മട്ടാഞ്ചേരി: സാധാരണ ജനങ്ങള്‍ ഏറെ ആശ്രയിക്കുന്ന മട്ടാഞ്ചേരി സ്ത്രീകളുടേയും കുട്ടികളുടേയും ആശുപത്രിയിലെ സോണോളജിസ്റ്റ്  സേവനം മതിയാക്കി മടങ്ങുന്നതായി വിവരം. ഗര്‍ഭിണികള്‍ ഉള്‍പ്പെടെ നിരവധി പേര്‍ ആശ്രയിക്കുന്ന ആശുപത്രിയില്‍ സോണോളജിസ്റ്റിന്റെ സേവനം  ഇല്ലാതാകുന്നത് ഏറെ പ്രതിസന്ധിക്കിടയാക്കും. സാധാരണ രീതിയില്‍ സ്‌കാനിങ് സംബന്ധിച്ച എല്ലാ കാര്യങ്ങളും സോണോളജിസ്റ്റാണ്  നിര്‍വഹിക്കുന്നത്. എന്നാല്‍ നിലവില്‍ ഈ ആശുപത്രിയില്‍ പ്രവര്‍ത്തിക്കുന്ന സോണോളജിസ്റ്റിന് സഹായത്തിന് മറ്റുള്ളവരുടെ സേവനം കൂടി ലഭിക്കണമത്രേ. എന്നാല്‍ സാങ്കേതികമായി ഇത് ശരിയല്ലാത്തതിനാല്‍ നേഴ്‌സുമാരെ നിയോഗിക്കുക ബുദ്ധിമുട്ടാണ്. ഇതാണ് സോണോളജിസ്റ്റ് സേവനം  അവസാനിപ്പിക്കുവാന്‍ പ്രേരിപ്പിക്കുന്നത്.
കഴിഞ്ഞ ആഴ്ചയില്‍ ഇത്തരത്തില്‍ സഹായി ഇല്ലായെന്ന കാരണം ചൂണ്ടിക്കാട്ടി ഇയാള്‍ സ്‌കാന്‍ ചെയ്യാന്‍ എത്തിയവരോട് മണിക്കൂറുകള്‍ക്ക് ശേഷം മടങ്ങുവാന്‍ ആവശ്യപ്പെട്ടു. എന്നാല്‍ ഇത് വലിയ പ്രതിഷേധങ്ങള്‍ക്കിടയാക്കിയതോടെ കുറച്ച് പേരുടെ പരിശോധനകള്‍ നടത്താന്‍ തയ്യാറായി. ബാക്കിയുള്ളവരെ മടക്കി അയക്കുകയും ചെയ്തു. അപ്പോള്‍ തന്നെ ഇയാള്‍ സേവനം നിര്‍ത്തുമെന്ന് പറഞ്ഞിരുന്നു.  അടിയന്തിരമായി ജില്ലാ മെഡിക്കല്‍ ഓഫീസര്‍ വിഷയത്തില്‍ ഇടപെടണമെന്നാണ്  നാട്ടുകാരുടെ ആവശ്യം.