കണ്ണൂര്‍:ലഹരിമുക്ത ബോധവല്‍ക്കരണം ലക്ഷ്യമിട്ട് സംസ്ഥാന സര്‍ക്കാര്‍ നടപ്പാക്കുന്ന വിമുക്തി ലഹരിവര്‍ജന മിഷന്റെ ജില്ലാതല ഉദ്ഘാടനത്തോടനുബന്ധിച്ച് വിളംബര ഘോഷയാത്രയും ബൈക്ക്‌റാലിയും ഫഌഷ്‌മോബും സംഘടിപ്പിച്ചു. കലക്ടറേറ്റ് പരിസരത്ത് നിന്നാരംഭിച്ച വിളംബരഘോഷയാത്ര പഴയ ബസ സ്റ്റാന്‍ഡ് പരിസരത്ത് സമാപിച്ചു. മുത്തുക്കുടകളുടെയും ബാന്റ് വാദ്യത്തിന്റെയും കളരിപ്പയറ്റിന്റെയും അകമ്പടിയോടെ നടന്ന വിളംബരഘോഷയാത്ര ജില്ലാ കലക്ടര്‍ മീര്‍ മുഹമ്മദലി ഉദ്ഘാടനം ചെയ്തു. വിമുക്തി മിഷന്‍ പ്രചാരണത്തിന്റെ ഭാഗമായി ഇന്ന് സംഘടിപ്പിക്കുന്ന കൂട്ടയോട്ടം വൈകീട്ട് അഞ്ചിന് കലക്ടറേറ്റ് പരിസരത്ത് നിന്ന് ആരംഭിക്കും. നാളെ വൈകീട്ട് അഞ്ചിന് മന്ത്രി കെ.കെ ശൈലജ വിമുക്തി മിഷന്റെ  ജില്ലാ തല ഉദ്ഘാടനം നിര്‍വഹിക്കും.