പനാജി: ഇന്ത്യയിലെ ഔദ്യോഗിക ഫുട്‌ബോള്‍ ലീഗായ ഐ ലീഗിനു വന്‍ തിരിച്ചടി നല്‍കി ഗോവന്‍ ടീമുകള്‍ പിന്‍മാറുന്നു. ഐ ലീഗിലെ നിറ സാന്നിധ്യങ്ങളായിരുന്ന ഗോവയില്‍ നിന്നുള്ള സാല്‍ഗോക്കര്‍ എഫ്.സി, സ്‌പോര്‍ടിങ് ക്ലബ്, ഡെംപോ സ്‌പോര്‍ട്‌സ് ക്ലബ് ടീമുകളാണ് ഐ ലീഗ് വിടാന്‍ തീരുമാനിച്ചത്. ആദ്യം സാല്‍ഗോക്കറും സ്‌പോര്‍ടിങുമാണ് സംയുക്തമായി ലീഗ് ഉപേക്ഷിക്കാന്‍ താരുമാനിച്ചത്. ഡെംപോ പിന്നീടാണ് തീരുമാനമെടുത്തത്. 2017-18 സീസണ്‍ മുതല്‍ ഐ ലീഗിനെ രണ്ടാം നിരയിലേക്ക് ഇറക്കി ഇന്ത്യന്‍ സൂപ്പര്‍ ലീഗിനെ (ഐ.എസ്.എല്‍) ഒന്നാം നിരയിലേക്കു ഉയര്‍ത്താനുള്ള ആള്‍ ഇന്ത്യ ഫുട്‌ബോള്‍ ഫെഡറേഷന്റെ തീരുമാനത്തില്‍ പ്രതിഷേധിച്ചാണ് ടീമുകളുടെ ഇപ്പോഴത്തെ നടപടി. ഐ.എസ്.എല്ലിലെ എട്ടു ടീമുകളില്‍ ഒന്നിനേയും അടുത്ത പത്തു വര്‍ഷത്തേക്ക് രണ്ടാം ഡിവിഷനിലേക്ക് മാറ്റില്ലെന്നു സംഘാടകരായ ഐ.എം.ജി- റിലയന്‍സും ടീമുകളുമായി കരാറുണ്ട്. ഇക്കാരണത്താല്‍ അടുത്ത പത്തു വര്‍ഷത്തേക്ക് ഐ ലീഗിലെ ഒരു ടീമിനും ഒന്നാം ഡിവിഷനില്‍ കളിക്കാന്‍ സാധിക്കില്ലെന്നും അതേസമയം ഐ ലീഗില്‍ നിന്നു പിന്‍മാറിയെങ്കിലും പ്രൊ ഗോവ ലീഗില്‍ മൂന്നു ടീമുകളും കളിക്കുമെന്നും ഗോവന്‍ ഉടമകള്‍ പറയുന്നു.
1996 നാഷനല്‍ ഫുട്‌ബോള്‍ ലീഗെന്ന പേരിലാണ് ഐ ലീഗ് ആരംഭിച്ചത്. പിന്നീട് ഐ ലീഗെന്ന പേരിലേക്ക് മാറിയ ടൂര്‍ണമെന്റില്‍ ഏറ്റവും കൂടുതല്‍ ഗോവയില്‍ നിന്നുള്ള ടീമുകളാണ് കളിക്കുന്നത്. ഏറ്റവും കൂടുതല്‍ ജേതാക്കളായിട്ടുള്ളതും ഗോവന്‍ ക്ലബുകള്‍ തന്നെ.