ധര്‍മശാല: ഇന്ത്യന്‍ പ്രീമിയര്‍ ലീഗി (ഐ.പി.എല്‍)നു ചെറു പതിപ്പ് വരുന്നു. ധര്‍മശാലയില്‍ നടക്കുന്ന ബി.സി.സി.ഐ വര്‍ക്കിങ് കമ്മിറ്റി യോഗത്തിലാണ് മിനി ഐ.പി.എല്‍ സംബന്ധിച്ച് തീരുമാനമുണ്ടായത്. എല്ലാ വര്‍ഷവും സെപ്റ്റംബര്‍ മാസത്തിലാണ് ഐ.പി.എല്ലിന്റെ ചെറു പതിപ്പായ മിനി ഐ.പി.എല്‍ മത്സരങ്ങള്‍ നടക്കുക. ബി.സി.സി.ഐ സെക്രട്ടറി അനുരാഗ് ഠാക്കൂര്‍ ഇക്കാര്യം സ്ഥിരീകരിച്ചിട്ടുണ്ട്.
എന്നാല്‍ ഇന്ത്യയില്‍ വച്ചല്ല മത്സരങ്ങള്‍ നടക്കുക. വിദേശത്തു വച്ചാണ് മത്സരങ്ങള്‍. ബി.സി.സി.ഐയുടെ നേതൃത്വത്തിലായിരിക്കും മത്സരങ്ങള്‍ സംഘടിപ്പിക്കുക. രണ്ടു ആഴ്ച്ചയാണ് ടൂര്‍ണമെന്റിന്റെ പരമാവധി കാലാവധി. ഇതില്‍ ഹോം, എവേ മത്സരങ്ങള്‍ എന്ന രീതിയില്ലെന്ന് ഠാക്കൂര്‍ വ്യക്തമാക്കി. സ്റ്റാര്‍ ഇന്ത്യയ്‌ക്കോ, സോണിക്കോ ആയിരിക്കും മിനി ഐ.പി.എല്ലിന്റെ സംപ്രേഷണാവകാശം ലഭിക്കുക.
എന്നാല്‍ ഏത്ര ടീമുകള്‍ കളിക്കുമെന്നോ എതെല്ലാം താരങ്ങള്‍ കളിക്കുമെന്നോ ലേലത്തിന്റെ രീതികള്‍ എന്തെന്നോ ഇപ്പോള്‍ വ്യക്തമാക്കാനാവില്ല. സെപ്റ്റംബറില്‍ ഇത് നടക്കുമെന്ന് മാത്രമാണ് പറയാനാവുക. തിയതി സംബന്ധിച്ച് വരും ദിവസങ്ങളില്‍ തീരുമാനമുണ്ടാകുമെന്ന് ഠാക്കൂര്‍ പറഞ്ഞു.
വര്‍ക്കിങ് കമ്മിറ്റിയില്‍ അമേരിക്കയും യു.എ.ഇയും വേദികളാക്കണമെന്ന് ആവശ്യമുയര്‍ന്നിട്ടുണ്ട്. എന്നാല്‍ ഇതിനോട് ഠാക്കൂര്‍ അനുകൂല സമീപനം എടുത്തിട്ടില്ല.