ചെറുതുരുത്തി: പ്രതിദിനം നിരവധി രോഗികള്‍ ചികിത്സ തേടിയെത്തുന്ന വള്ളത്തോള്‍നഗര്‍ പ്രാഥമിക ആരോഗ്യകേന്ദ്രത്തിന്റെ പ്രവര്‍ത്തനം താളം തെറ്റുന്നു. ജീവനക്കാരുടെ അഭാവം മൂലം രോഗികളെ പരിശോധിക്കുന്നതും മരുന്നുകള്‍ വിതരണം ചെയ്യുന്നതും ഡോക്ടര്‍ തന്നെയാണ്. പി.എച്ച്.സിയിലെ ഫാര്‍മസിസ്റ്റ് മാര്‍ച്ച് 31ന് സര്‍വിസില്‍നിന്നു വിരമിച്ചതും സഹായിയായിരുന്ന സ്റ്റാഫ് നേഴ്‌സ് അവധിയില്‍ പോയതുമാണു ഡോക്ടറായ എ.വി സുരേഷിനു ഇപ്പോള്‍ അമിതഭാരമായി മാറിയിരിക്കുന്നത്.
പി.എച്ച്.സിയിലെ പ്രവര്‍ത്തിസമയം രാവിലെ ഒന്‍പത് മുതല്‍ രണ്ടു വരെയാണെങ്കിലും രാവിലെ നേരത്തെ തന്നെ എത്തുന്ന രോഗികളുടെ തിരക്കും ബുദ്ധിമുട്ടും മനസിലാക്കിയ ഡോക്ടര്‍ ഇവരെ സഹായിക്കുന്നതിനായി ഫാര്‍മസി മുറിയെ തന്നെ ഇപ്പോള്‍ പരിശോധന മുറിയാക്കി മാറ്റിയിരിക്കുകയാണ്. ഒന്നര വര്‍ഷം മുന്‍പ് ഫാര്‍മസിസ്റ്റ് അവധിയിലിരിക്കെ മരുന്നു മാറി നല്‍കിയെന്നാരോപിച്ച് സ്റ്റാഫ് നേഴ്‌സിനെതിരേ പരാതിയും ഇതിനെ തുടര്‍ന്നു കോടതിയില്‍ കേസും നടന്നിരുന്നു.
നിലവില്‍ ഫാര്‍മസിസ്റ്റ് റിട്ടയര്‍ ചെയ്തതോടെ മാസങ്ങള്‍ക്കകം റിട്ടയര്‍മെന്റ് കാത്തിരിക്കുന സ്റ്റാഫ് നഴ്‌സും മറ്റു വിഷയങ്ങള്‍ പേടിച്ചു ലീവില്‍ പോവുകയായിരുന്നു. പി.എച്ച്.സിയിലെത്തുന്ന എല്ലാവര്‍ക്കും ചികിത്സ ഉറപ്പു വരുത്തുന്നുണ്ടെങ്കിലും ആവശ്യത്തിനു മരുന്നില്ലാത്ത അവസ്ഥയുമുണ്ട്.
കേന്ദ്രത്തില്‍ പുതിയ ഫാര്‍മസിസ്റ്റിനെ കൊണ്ടുവരാന്‍ വേണ്ട അടിയന്തര നടപടികള്‍ അധികൃതര്‍ സ്വീകരിക്കണമെന്നും അല്ലെങ്കില്‍ താല്‍ക്കാലിക ഫര്‍മസിസ്റ്റിനെ നിയമിക്കാന്‍ പഞ്ചായത്ത് നടപടി സ്വീകരിണമെന്നും യൂത്ത് ലീഗ് ആവശ്യപ്പെട്ടു. ഇതിനു തയ്യാറായില്ലെങ്കില്‍ ജനങ്ങളെ അണിനിരത്തി പ്രക്ഷോഭം ആരംഭിക്കുമെന്നു ജില്ലാ കൗണ്‍സിലര്‍ ടി.ബി മൊയ്തീന്‍കുട്ടി മുന്നറിയിപ്പ് നല്‍കി.