കുന്നംകുളം :സമ്പൂര്‍ണവൈദ്യുതീകരണത്തിന്റെ ഭാഗമായി കുന്നംകുളം നിയോജകമണ്ഡലത്തിലെ  എല്ലാ വീടുകളും മാര്‍ച്ച് 31 നകം  വൈദ്യുതീകരിക്കാന്‍ വ്യവസായവകുപ്പ് മന്ത്രി എ സി മൊയ്തീന്റെ നിര്‍ദേശം. മാര്‍ച്  മാസത്തോടെ സംസ്ഥാനത്ത് സമ്പൂര്‍ണവൈദ്യുതീകരണം നടപ്പാക്കുന്നതിന്റെ ഭാഗമായാണ് നിയോജകമണ്ഡലത്തിലെ എല്ലാ വീടുകളും വൈദ്യുതീകരിക്കാന്‍ മന്ത്രി നിര്‍ദേശം നല്‍കിയിട്ടുള്ളത്. സമ്പൂര്‍ണ  വൈദ്യുതീകരണത്തിന്റെ ഭാഗമായി കുന്നംകുളം നിയോജകമണ്ഡലത്തിലെ വൈദ്യുതീകരണ പ്രവര്‍ത്തനങ്ങള്‍ അവലോകനം ചെയ്യുന്നതിനായി മന്ത്രി വിളിച്ചുചേര്‍ത്ത  യോഗത്തിലാണ് മന്ത്രി ഇക്കാര്യം അറിയിച്ചത്. തര്‍ക്കങ്ങളില്‍ നില്‍ക്കുന്ന വീടുകളില്‍ ഒഴികെ നിയോജകമണ്ഡലത്തിലെ ബാക്കിയുള്ള എല്ലാ വീടുകളിലും വൈദ്യുതി എത്തിക്കാനുള്ള നടപടി ഉണ്ടാകണമെന്ന് മന്ത്രി, കെ എസ്  ഇ ബി ഉദ്യോഗസ്ഥര്‍ക്കും പഞ്ചായത്ത് പ്രസിഡന്റുമാര്‍ക്കും നിര്‍ദേശം നല്‍കി. യോഗത്തില്‍ കുന്നംകുളം നഗരസഭ ചെയര്‍പേഴ്‌സണ്‍ സീത രവീന്ദ്രന്‍, കെ എസ് ഇ ബി എക്‌സിക്യൂട്ടീവ് എന്‍ജിനീയര്‍ ടി പി സൗദാമിനി, പഞ്ചായത്ത് പ്രസിഡന്റുമാര്‍, മറ്റു ഉദ്യോഗസ്ഥരും പങ്കെടുത്തു.