കാട്ടാക്കട: കുപ്രസിദ്ധ കുറ്റവാളി പറക്കുംതളിക ബൈജുവിനെ പൊലിസ് രക്ഷപെടാന്‍ അനുവദിച്ചെന്ന ആരോപണത്തില്‍ അന്വേഷണ റിപ്പോര്‍ട്ട് ഇന്ന് റൂറല്‍ എസ്പിക്ക് കൈമാറും.
കഴിഞ്ഞ ദിവസം കൈമാറാനാണ് തീരുമാനിച്ചിരുന്നത്. എന്നാല്‍ ചിലരുടെ മൊഴി എടുക്കേണ്ടതിനാല്‍ ഇന്നത്തേയ്ക്ക് മാറ്റി.
സ്‌പെഷ്യല്‍ ബ്രാഞ്ച് ഡിവൈ.എസ്പി ശ്യാംലാലാണ് ഇതുസംബന്ധിച്ച റിപ്പോര്‍ട്ട് റൂറല്‍ ജില്ലാ പൊലിസ് മേധാവിക്ക് സമര്‍പിക്കുന്നത്. ബന്ധുക്കള്‍ തമ്മിലുണ്ടായ അടിപിടിയെ തുടര്‍ന്ന് തലയ്ക്ക് പരുക്കേറ്റ പറക്കുംതളികയെ വിളപ്പില്‍ശാല പൊലിസാണ് ജനറല്‍ ആശുപത്രിയില്‍ പ്രവേശിപ്പിച്ചത്. ചികിത്സയ്ക്കിടെ പറക്കുംതളിക ആശുപത്രിയില്‍ നിന്ന് മുങ്ങി.
ഇതോടെ പിടികിട്ടാപുള്ളിയാണ് പറക്കുംതളികയെന്നും ഇയാളെ പൊലിസ് രക്ഷപെടാന്‍ അനുവദിച്ചുവെന്നും വാര്‍ത്ത പരന്നിരുന്നു.
തുടര്‍ന്ന് സംഭവത്തെ കുറിച്ച് വിശദമായ അന്വഷണത്തിന് ജില്ലാ പൊലിസ് മേധാവി സ്‌പെഷ്യല്‍ ബ്രാഞ്ച് ഡിവൈ.എസ്പി ശ്യാം ലാലിനെ ചുമതലപ്പെടുത്തി. ഇക്കഴിഞ്ഞ വെളളിയാഴ്ച വിളപ്പില്‍ശാല എസ്‌ഐ കണ്ണനെയും പറക്കുംതളികയെ ആശുപത്രിയിലെത്തിച്ച പൊലിസുകാരെയും വിളിച്ചുവരുത്തി മൊഴി രേഖപ്പെടുത്തിയിരുന്നു.
പൊലിസിന്റെ മൊഴിയുടെയും വിശദമായ അന്വഷണത്തിന്റേയും അടിസ്ഥാനത്തില്‍ തയ്യാറാക്കിയ റിപ്പോര്‍ട്ടാണ് ഇന്ന് എസ്പിക്ക് കൈമാറുന്നത്.
നിലവില്‍ ഒരു കേസിലും വാറണ്ടില്ലാത്ത പറക്കുംതളികയെ കസ്റ്റഡിയില്‍ എടുക്കാത്ത വിളപ്പില്‍ശാല പൊലിസിന്റെ നടപടിയില്‍ വീഴ്ചയില്ലെന്നാണ് റിപ്പോര്‍ട്ടെന്ന് സൂചനയുണ്ട്.