തളിപ്പറമ്പ്: നഗരത്തില്‍ കഞ്ചാവ് വില്‍ക്കാനെത്തിയ എറണാകുളം സ്വദേശിയെ എക്‌സൈസ് സംഘം പിടികൂടി. എറണാകുളം കാഞ്ഞിരമറ്റം ചരണക്കാട്ട് വീട്ടില്‍ ജിനദേവ്(34)നെയാണ് തളിപ്പറമ്പ് എക്‌സൈസ് സി.ഐ കെ.കെ ദിനേശനും സംഘവും ചേര്‍ന്ന് പിടികൂടിയത്. ഇന്നലെ രാവിലെ 10.30ന് തളിപ്പറമ്പ് മദ്‌റസ റോഡില്‍ ബാഗില്‍ കഞ്ചാവുമായി കൈമാറാനുള്ള വ്യക്തിയെ കാത്തുനില്‍ക്കവേയാണ് ജിനദേവ് പിടിയിലായത്. ഇയാളില്‍ നിന്ന് 1.1 കിലോഗ്രാം കഞ്ചാവ് കണ്ടെടുത്തു. കമ്പത്തു നിന്നു വാങ്ങിയ കഞ്ചാവ് തളിപ്പറമ്പിലെത്തിക്കാനായിരുന്നു ഇയാള്‍ക്കുള്ള നിര്‍ദേശമെന്ന് ചോദ്യം ചെയ്യലില്‍ വ്യക്തമായിട്ടുണ്ട്.
കറുത്ത ടീഷര്‍ട്ട് ധരിച്ച് മാര്‍ക്കറ്റ് റോഡില്‍ നിന്നാല്‍ ആളുകള്‍ വന്ന് കഞ്ചാവ് വാങ്ങിക്കൊണ്ടുപോകുമെന്നായിരുന്നു ഇയാള്‍ക്ക് ലഭിച്ച നിര്‍ദേശം. ചെറുപൊതികളാക്കി വില്‍പ്പന നടത്തിയാല്‍ 75,000 രൂപയോളം വില മതിക്കുന്നതാണ് പിടികൂടിയ കഞ്ചാവ്. വടകര നര്‍ക്കോട്ടിക് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.