ചങ്ങരംകുളം: എടപ്പാളില്‍ തിയറ്ററില്‍ പത്തു വയസുകാരിയെ ലൈംഗിക പീഡനത്തിനിരയാക്കിയ സംഭവത്തില്‍ അന്വേഷണസംഘം തെളിവെടുപ്പ് തുടങ്ങി. 

ജില്ലാ ക്രൈം റിക്കാര്‍ഡ്‌സ് ബ്യൂറോ ഡിവൈ.എസ്.പി ഷാജി വര്‍ഗീസ് ആണ് അന്വേഷണം ആരംഭിച്ചത്. ചങ്ങരംകുളം സ്റ്റേഷനിലെത്തി നാലു മണിക്കൂറോളം സംഭവവുമായി ബന്ധപ്പെട്ടവരെ ചോദ്യം ചെയ്തു. പീഡനം നടന്ന തിയറ്ററിലും ഉദ്യോഗസ്ഥരെത്തി ജീവനക്കാരെ ചോദ്യം ചെയ്തു.
ഉച്ചക്ക് മൂന്നു മുതല്‍ ആറു വരെ സ്റ്റേഷനില്‍ ചങ്ങരംകുളം എസ്.ഐയായിരുന്ന ബേബി, സ്റ്റേഷനില്‍ ഉണ്ടായിരുന്ന ഉദ്യോഗസ്ഥര്‍, പരാതി കൈമാറിയ ചൈല്‍ഡ് ലൈന്‍ പൊന്നാനി കോ ഓര്‍ഡിനേറ്റര്‍ ഷിഹാബ് തുടങ്ങിയവരെയും വിശദമായി ചോദ്യം ചെയ്തു.
അന്വേഷണം തുടരുകയാണെന്നും കൂടുതല്‍ വിവരങ്ങള്‍ പുറത്ത് പറയാന്‍ കഴിയില്ലെന്നും ഉദ്യോഗസ്ഥര്‍ പറഞ്ഞു. ആവശ്യമെങ്കില്‍ പ്രതികളെ കസ്റ്റഡിയില്‍ വാങ്ങുമെന്നും ആരോപണങ്ങളും ആക്ഷേപങ്ങളും അന്വേഷിക്കുന്നുണ്ടെന്നും ഡിവൈ.എസ്.പി പറഞ്ഞു.