കൊച്ചി: കായലില്‍ മരിച്ച നിലയില്‍ കണ്ടെത്തിയ സി.എ വിദ്യാര്‍ഥിനി മിഷേല്‍ ഷാജിയെ, സംഭവവുമായി ബന്ധപ്പെട്ട് പൊലിസ് കസ്റ്റഡിയിലെടുത്ത ക്രോണിന്‍ അലക്‌സാണ്ടര്‍ ഉപദ്രവിച്ചിട്ടുണ്ടെന്ന് സുഹൃത്തിന്റെ മൊഴി. പൊലിസിന് നല്‍കിയ മൊഴിയിലാണ് സുഹൃത്തിന്റെ വെളിപ്പെടുത്തല്‍. മിഷേലിനെ ക്രോണിന്‍ ഉപദ്രവിച്ചിരുന്നെന്നും ആത്മഹത്യ ചെയ്യുകയാണെങ്കില്‍ ഇതിനു മുന്‍പ് തന്നെ മിഷേല്‍ അത് ചെയ്യുമായിരുന്നുവെന്നും സുഹൃത്ത് മൊഴിനല്‍കി.

ക്രോണില്‍ നിന്നും മിഷേലിന് നിരന്തരം മാനസിക സമ്മര്‍ദ്ദമേല്‍ക്കേണ്ടി വന്നിട്ടുണ്ട്. ആത്മഹത്യ ചെയ്യുകയാണെങ്കില്‍ മിഷേല്‍ അന്ന് ചെയ്യുമായിരുന്നുവെന്നും സുഹൃത്ത് പറയുന്നു.

മിഷേലിനെ കാണാതായ അന്ന് ഫോണില്‍ വിളിച്ചപ്പോള്‍ സാധാരണ രീതിയിലാണ് സംസാരിച്ചത്. 27ാം തിയ്യതി വരുമ്പോള്‍ കാണാമെന്നും പറഞ്ഞിരുന്നുവെന്നും സുഹൃത്ത്  നല്‍കിയ മൊഴിയില്‍ പറയുന്നു. എല്ലാം തുറന്നു സംസാരിക്കുന്ന മിഷേല്‍ അന്ന് ക്രോണിനുമായി വഴക്കുണ്ടായ കാര്യമൊന്നും പറഞ്ഞിട്ടില്ലെന്നും സുഹൃത്ത് പറഞ്ഞു.

മിഷേല്‍ ആത്മഹത്യ ചെയ്തതല്ലെന്ന കുടുംബത്തിന്‍റെ ഭാഷ്യത്തിന് കരുത്തുപകരുന്നതാണ് ഇപ്പോള്‍ സുഹൃത്ത് നല്‍കിയ മൊഴി.