പട്ടാമ്പി: കൊച്ചി ബോള്‍ഗാട്ടി പാലസിനു സമീപം വാട്ടര്‍ബൈക്ക് മുങ്ങി കാണാതായ പട്ടാമ്പി സ്വദേശി വിനീഷിന്റെ തിരിച്ചുവരവുകാത്തു പ്രാര്‍ഥനയോടെ കുടുംബം. പട്ടാമ്പി പരുതൂര്‍ കൈതംപറമ്പത്ത് പരേതനായ വിശ്വനാഥന്റെ മകന്‍ വിനീഷിനെ(24)യാണ് കാണാതായത്. വ്യാഴാഴ്ചയായിരുന്നു സംഭവം. മറൈന്‍ ഡ്രൈവിലെ ഒരു പരസ്യ ഏജന്‍സിയിലെ ജീവനക്കാരനാണ് വിനീഷ്. ഷൊര്‍ണൂര്‍ ഗവ. പോളിടെക്‌നിക്കില്‍ കംപ്യൂട്ടര്‍ ഡിപ്ലോമ കഴിഞ്ഞു വളാഞ്ചേരിയില്‍ ജോലി ചെയ്യവേയാണ് എറണാകുളത്തെ കമ്പനിയിലേക്കു മാറിയത്. വൈറ്റില ആര്‍.എസ്.എ.സി റോഡില്‍ വാടകയ്ക്കായിരുന്നു താമസം. സംഭവം നടന്ന വ്യാഴാഴ്ച വൈകിട്ട് വീടിന്റെ ഉടമയാണ് വീട്ടുകാരെ അപകടവിവരം അറിയിച്ചത്. തീരദേശ പൊലിസിന്റെ നേതൃത്വത്തില്‍ പരിശോധന നടത്തിയെങ്കിലും കണ്ടെത്താനായിട്ടില്ല.