മണ്ണാര്‍ക്കാട്: വൃദ്ധയെ റോഡരികില്‍ മരിച്ച നിലയില്‍ കാണപ്പെട്ട സംഭവത്തില്‍ പേരമകനെയും ഭാര്യയേയും പൊലിസ് അറസ്റ്റ് ചെയ്തു. കരിമ്പുഴ തോട്ടര ഈങ്ങാകോട്ടില്‍ മമ്മിയുടെ ഭാര്യ നബീസ (71)നെയാണ് കഴിഞ്ഞ വെളളിയാഴ്ച രാവിലെ 12 മണിയോടെ ആര്യമ്പാവിന് സമീപം ഒറ്റപ്പാലം സംസ്ഥാന പാതക്കരികില്‍ മരിച്ച നിലയില്‍ കണ്ടത്.
സംഭവവുമായി ബന്ധപ്പെട്ട് പൊലിസ് നടത്തിയ അന്വേഷണത്തിലാണ് മരണപ്പെട്ട നബീസയുടെ മകളുടെ മകനും കരിമ്പുഴ തോട്ടര പടിഞ്ഞാറേതില്‍ വീട്ടില്‍ മുഹമ്മദ് എന്ന മമ്മുവിന്റെ മകനുമായ ബഷീര്‍ (33), ഭാര്യ കണ്ടമംഗലം സ്വദേശിനിയായ ഫസീല (27) എന്നിവരെയാണ് മണ്ണാര്‍ക്കാട് പൊലിസ് അറസ്റ്റ് ചെയ്തത്. സംഭവത്തെ കുറിച്ച് പൊലിസ് പറയുന്നത് ഈ മാസം 21ന് നൊട്ടമലയിലെ ബന്ധുവീട്ടില്‍ നോമ്പുതുറക്കാന്‍ പോയ നബീസയെ കാണാതാവുകയായിരുന്നു.
പിന്നീട് നബീസയുടെ മൃതദേഹം 24ന് ഉച്ചയോടുകൂടിയാണ് റോഡരികില്‍ കണ്ടെത്തിയത്. ബഷീറിന്റെ പിതാവിന് ഭക്ഷണത്തില്‍ വിഷം കൊടുത്ത് കൊല്ലാന്‍ ശ്രമിച്ചുവെന്ന കാരണത്താല്‍ വീട്ടില്‍ നിന്ന് പുറത്താക്കപ്പെട്ട ഫസീലയേയും കൂട്ടി സ്വന്തം വീട്ടിലേക്ക് തിരിച്ച് കയറാന്‍ വല്ല്യുമ്മയായ നബീസയായിരുന്നു തടസ്സം.
നേരത്തെ തോട്ടരയിലെ വീട്ടില്‍ നിന്ന് 43 പവന്‍ സ്വര്‍ണ്ണാഭരണം കാണാതായ സംഭവത്തിലും ഫസീലയിലേക്കായിരുന്നു സംശയം എത്തിയിരുന്നത്. ഇത് നബീസയുടെ തലയില്‍ കെട്ടിവെച്ച് രക്ഷപ്പെടാനുളള ശ്രമമാണ് കൊലപാതകത്തിലെത്തിച്ചത്.
ബുധനാഴ്ച രാത്രി ഭക്ഷണത്തില്‍ ചീരക്കറിയില്‍ ചിതലിനുളള മരുന്ന് ചേര്‍ത്ത് കഴിക്കാന്‍ കൊടുത്തു. എന്നാല്‍ നബീസക്ക് കാര്യമായ അസ്വസ്ഥകളൊന്നുമുണ്ടായില്ല.
തുടര്‍ന്ന് രാത്രി വൈകി ബലം പ്രയോഗിച്ച് നബീസയുടെ വായിലേക്ക് വിഷം ഒഴുക്കുകയായിരുന്നു. മൃതദേഹം ഒരുദിവസം വീട്ടില്‍ സൂക്ഷിച്ച ശേഷം വ്യാഴാഴ്ച അര്‍ദ്ധരാത്രിയോടെ നേരത്തെ ബഷീറും ഫസീലയും തയ്യാറാക്കിയ ആത്മാഹ്ത്യ കുറിപ്പ് സഹിതം മൃതദേഹം റോഡരികില്‍ ഉപേക്ഷിക്കുകയായിരുന്നു.
ആത്മാഹ്ത്യ കുറിപ്പ് സംബന്ധിച്ച നാട്ടുകാരുടെ സംശയമാണ് കേസിന് തുമ്പുണ്ടാക്കിയത്.
പ്രതികളെ പൊലിസ് സ്റ്റേഷനില്‍ അന്വേഷണത്തിനെന്ന വ്യാജേനെ വിളിച്ചുവരുത്തി അറസ്റ്റ് രേഖപ്പെടുത്തുകയായിരുന്നു.
ഫോറന്‍സിക് വിദഗ്ധര്‍ സംഭവ സ്ഥലത്തെത്തി തെളിവെടുപ്പ് നടത്തി. കേസന്വേഷണത്തിന് പാലക്കാട് എസ്.പി ഡോ. ശ്രീനിവാസ്, ഷൊര്‍ണൂര്‍ ഡി.വൈ.എസ്.പി സുനീഷ്‌കുമാര്‍, മണ്ണാര്‍ക്കാട് സി.ഐ. എം മുഹമ്മദ് ഹനീഫ, എസ്.ഐമാരായ ഷിജു എബ്രഹാം, മുരളീധരന്‍, എ.എസ്.ഐമാരായ റോയ് ജോര്‍ജ്ജ്, അബ്ദുല്‍ സലാം, സി.പി.ഒമാരായ മണികണ്ഠന്‍, ബെന്നി, സതീഷ്, ഷാഫി, സഹദ്, അഭിലാഷ്, വനിതാ സി.പി.ഒമാരായ നിത്യ, ഓമന എന്നിവരാണ് നേതൃത്വം നല്‍കിയത്.