കട്ടപ്പന: മധ്യവയസ്‌കനെ ഓട്ടോ ഇടിപ്പിച്ച് കൊലപ്പെടുത്തിയ കേസില്‍ യുവാവിനെ കട്ടപ്പന ഡി.വൈ.എസ്.പി എന്‍.സി രാജ്‌മോഹന്റെ നേതൃത്വത്തിലുള്ള പൊലിസ് സംഘം അറസ്റ്റുചെയ്തു. കട്ടപ്പന കല്ലുകുന്ന് സ്വദേശി കൊല്ലശ്ശേരില്‍ സനലാണ് (28) പിടിയിലായത്.
തിങ്കളാഴ്ച രാത്രി 10 ഓടെയാണ് കുന്തളംപാറ സ്വദേശിയായ ഇല്ലത്തുപറമ്പില്‍ കണ്ണനെ ( 47) സനലിന്റെ ഓട്ടോ ഇടിച്ച് ഗുരുതരപരിക്കുകളോടെ കട്ടപ്പനയിലെ സ്വകാര്യ ആശുപത്രിയില്‍ പ്രവേശിപ്പിച്ചതും പിന്നീട് മരണം സംഭവിച്ചതും. തലക്ക് ഉണ്ടായ പരിക്കാണ് മരണകാരണമെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറഞ്ഞിരുന്നത്.
സനലിന്റെ ഓട്ടോ ഇടിച്ചാണ് കണ്ണന്‍ മരിച്ചതെന്ന ദൃക്‌സാക്ഷി മൊഴിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് സനലിനെ പടികൂടിയത്. രണ്ട് മാസം മുന്‍പ് കട്ടപ്പന സെന്‍ട്രല്‍ ജംഗ്ഷനിലെ നൈറ്റുകടയില്‍ വെച്ച് കൊല്ലപ്പെട്ട കണ്ണനും സനലും തമ്മില്‍ വാക്കേറ്റം ഉണ്ടാകുകയും ഇതേ തുടര്‍ന്ന് പിന്നീട് ഇവര്‍ തമ്മില്‍ അസഭ്യം പറയുന്നതും പതിവായിരുന്നു. തിങ്കളാഴ്ച ബാറില്‍ വെച്ച് വാക്കേറ്റം ഉണ്ടാകുകയും തുടര്‍ന്ന് മാര്‍ക്കറ്റിന് സമീപത്ത് വെച്ച് ഓട്ടോ ഇടിച്ച് ഇടുകയുമായിരുന്നു. വീഴ്ചയില്‍ തലക്ക് പരിക്ക് പറ്റിയാണ് മരണം സംഭവിച്ചിരിക്കുന്നത്. മുന്‍വൈരാഗ്യത്തിന്റെ പേരില്‍ കരുതിക്കൂട്ടിയുള്ള കൊലപാതകമാണെന്ന് പൊലിസ് സ്ഥിരീകരിച്ചിട്ടുണ്ട്. കൊലക്കുറ്റത്തിന് കേസെടുത്ത സനലിനെ കോടതിയില്‍ ഹാജരാക്കി റിമാന്റ് ചെയ്തു.