ഡോന്‍ഗെ സിറ്റി: നിലവിലെ ചാംപ്യന്‍മാരായ ഇന്ത്യ വനിതാ ഏഷ്യന്‍ ചാംപ്യന്‍സ് ട്രോഫി ഹോക്കി പോരാട്ടത്തിന്റെ ഫൈനലിലെത്തി.
മലേഷ്യയെ രണ്ടിനെതിരേ മൂന്ന് ഗോളുകള്‍ക്ക് തകര്‍ത്താണ് ഇന്ത്യ ഒരു മത്സരം ബാക്കി നില്‍ക്കെ ഫൈനല്‍ ബര്‍ത്ത് ഉറപ്പിച്ചത്. തുടര്‍ച്ചയായ മൂന്ന് വിജയങ്ങളുമായി ഒന്‍പത് പോയിന്റോടെയാണ് ഇന്ത്യന്‍ വനിതകളുടെ മുന്നേറ്റം. ആദ്യ മത്സരത്തില്‍ ഇന്ത്യ ജപ്പാനെ 4-1ന് തകര്‍ത്താണ് പോര് തുടങ്ങിയത്. രണ്ടാം മത്സരത്തില്‍ ചൈനയെ 3-1ന് പരാജയപ്പെടുത്തി കരുത്തറിയിച്ച ഇന്ത്യ മൂന്നാം പോരില്‍ മലേഷ്യയുടെ തിരിച്ചുവരാനുള്ള ശ്രമത്തെ സമര്‍ഥമായി തടഞ്ഞാണ് വിജയം പിടിച്ചത്.
കളിയുടെ 17ാം മിനുട്ടില്‍ ഗുര്‍ജിത് കൗര്‍ ഇന്ത്യക്ക് ലീഡ് സമ്മാനിച്ചു. 33ാം മിനുട്ടില്‍ വന്ദന കടാരിയ രണ്ടാം ഗോളും ഏഴ് മിനുട്ടിനുള്ളില്‍ ലാല്‍റെംസിയാമി മൂന്നാം ഗോളും നേടി. അതിനിടെ 36ാം മിനുട്ടില്‍ മലേഷ്യ നുറൈനി റഷീദിലൂടെ ഒരു ഗോള്‍ മടക്കി തിരിച്ചടിക്കുള്ള തുടക്കമിട്ടു. 48ാം മിനുട്ടില്‍ ഹനിസ് ഒന്‍ മലേഷ്യക്കായി രണ്ടാം ഗോളും നേടി. എന്നാല്‍ പിന്നീട് ഗോള്‍ വഴങ്ങാതെ പ്രതിരോധം ശക്തിയാക്കി ഇന്ത്യ മത്സരം വരുതിയില്‍ നിര്‍ത്തി. നാളെ കൊറിയക്കെതിരേയാണ് ഇന്ത്യയുടെ അടുത്ത മത്സരം. ഫൈനല്‍ പോരാട്ടം ഞായറാഴ്ച അരങ്ങേറും.