ബോവിക്കാനം: ബേഡഡുക്ക-മുളിയാര്‍ പഞ്ചായത്തുകളെ ബന്ധിപ്പിക്കുന്ന പാണ്ടിക്കണ്ടം റഗുലേറ്റര്‍ കം ബ്രിഡ്ജ് നാളെ രാവിലെ പത്തിന് ജലസേചന വകുപ്പ് മന്ത്രി മാത്യു ടി. തോമസ് നാടിനു സമര്‍പ്പിക്കും.
21 കോടി രൂപ ചെലവില്‍ 106.75 മീറ്റര്‍ നീളത്തിലും 4.27 മീറ്റര്‍ വീതിയിലും പയസ്വിനി പുഴയ്ക്കു കുറുകെ പാണ്ടിക്കണ്ടത്താണ് പാലവും അനുബന്ധ തടയണയും നിര്‍മിച്ചത്.
മലയോര മേഖലയിലെ യാത്രാപ്രശ്‌നം പരിഹരിക്കുന്നതിനൊപ്പം ജലക്ഷാമം പരിഹരിക്കാനും കൂടിയാണ് പദ്ധതി നടപ്പാക്കിയത്.
മൂന്നുമീറ്റര്‍ ഉയരത്തിലുള്ള തടയണയില്‍ രണ്ടു കിലോമീറ്റര്‍ വരെ പുഴയില്‍ വെള്ളം സംഭരിച്ചു നിര്‍ത്താനും ഇതിന്റെ ഷട്ടര്‍ തുറന്നാല്‍ അഞ്ചു കിലോമീറ്റര്‍ താഴെയുള്ള ബാവിക്കര ജലസംഭരണിയിലേക്കു വെള്ളം എത്തിക്കാനും സാധിക്കും.
പദ്ധതി പൂര്‍ത്തിയായതോടെ മുളിയാര്‍, കൊളത്തൂര്‍, ബേഡഡുക്ക വില്ലേജുകളിലെ 2010 ഏക്കര്‍ ഭൂമിയില്‍ ജലസേചനം നടത്താനും സമീപ പ്രദേശങ്ങളില്‍ ജലസാന്നിധ്യം ഉറപ്പുവരുത്താനും സാധിക്കുമെന്നാണ് പ്രതീക്ഷ.