ഷൊര്‍ണൂര്‍: ഷൊര്‍ണൂര്‍ മേഖലയില്‍ കുടിവെള്ളക്ഷാമം രൂക്ഷമായി കൊണ്ടിരിക്കേ പൊതു കിണറുകള്‍ നശിച്ചുകൊണ്ടിരിക്കുന്നു.
ജലസമൃദ്ധിയാല്‍ നിറഞ്ഞ രണ്ടുകിണറുകളാണ് അധികൃതരുടെ അലംഭാവം കാരണം നശിച്ചുകൊണ്ടിരിക്കുന്നത്.
ചുഡുവാലത്തൂര്‍ എസ്.ആര്‍.വി.എല്‍.പി സ്‌കൂളിനു സമീപമുള്ള പൊതുകിണറും, കുളഞ്ചേരി കുളത്തിനു സമീപമുള്ള മറ്റൊരു കിണറുമാണ് നശിച്ചുകൊണ്ടിരിക്കുന്നത്.
സ്‌കൂളിനു സമീപമുള്ള കിണറിന് ചുറ്റുമതില്‍ ഉണ്ടായിരുന്നത് തകര്‍ന്നു വീണു കിണറിനു ചുറ്റും ചപ്പുചവറുകള്‍ കൂനയായി കിടക്കുകയാണ്.
കിണറില്‍നിന്ന് ചണ്ടികോരി വൃത്തിയാക്കി ചുറ്റുമതില്‍ കെട്ടി കിണര്‍ നന്നാക്കണമെന്നാണ് പരിസരവാസികള്‍ പറയുന്നത്.
കുളഞ്ചേരി കുളത്തിനു സമീപമുള്ള കിണറില്‍ ചണ്ടി നിറഞ്ഞിരിക്കുകയാണ്.
ഈ കിണറില്‍നിന്നാണ് ആദ്യകാലങ്ങളില്‍ ഫയര്‍ സ്റ്റേഷന്റെ വണ്ടികള്‍ക്ക് വെള്ളം ശേഖരിച്ചിരുന്നത്.