വേങ്ങര: കടലുണ്ടിപ്പുഴയോരത്തെ വലിയോറ മഞ്ഞമ്മാട് പാലത്തിനു സമീപം കിണറ്റില്‍ അജ്ഞാത മൃതദേഹം കണ്ടെത്തി. റോഡിനു ചേര്‍ന്നുള്ള കോരം കുളങ്ങര നൗഷാദിന്റെ പറമ്പിലെ ഉപയോഗശൂന്യമായ കിണറ്റില്‍ വെള്ളിയാഴ്ച വൈകുന്നേരം മൂന്നു മണിയോടെയാണ് മൃതദേഹം കണ്ടെത്തിയത്.
മൃതദേഹത്തിന് നാലു ദിവസത്തിലധികം പഴക്കമുണ്ടെന്ന് കരുതുന്നതായി പൊലിസ് പറഞ്ഞു. സമീപത്ത് ചെരുപ്പ് കിടക്കുന്നതു കണ്ട് നടത്തിയ തിരച്ചിലിലാണ് റോഡില്‍ നിന്നും പത്തടിയോളം താഴ്ചയിലുളള കിണറ്റില്‍ മൃതദേഹം കമഴ്ന്നു കിടക്കുന്നത് കണ്ടത്. തുടര്‍ന്ന് വേങ്ങര എസ്.ഐ സംഗീത് പുനത്തില്‍ അഡീഷനല്‍ എസ്.ഐ സലീഷ് എന്നിവര്‍ സ്ഥലത്തെത്തി.
മലപ്പുറം ഫയര്‍ ആന്‍ഡ് റെസ്‌ക്യൂ സ്റ്റേഷന്‍ അസിസ്റ്റന്റ് ഓഫിസര്‍ പി പ്രദീപിന്റെ നേതൃത്വത്തിലുള്ള സംഘമാണ് ജഡം പുറത്തെടുത്തത്. മൃതദേഹം കോഴിക്കോട് മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റി.