കൊല്ലം: ഖാദി ഗ്രാമവ്യവസായ യൂണിറ്റുകളുടെ ജില്ലാതല പ്രദര്‍ശന വിപണന മേളക്ക് തുടക്കമായി. കര്‍ബലയിലെ ജില്ലാ ഖാദി ഗ്രാമ വ്യവസായ ഓഫിസ് അങ്കണത്തില്‍ എം. നൗഷാദ് എം.എല്‍.എ പ്രദര്‍ശനം ഉദ്ഘാടനം ചെയ്തു. ഖാദി ഉല്‍പന്നങ്ങളുടെ പ്രചാരണത്തിന് പുതിയ കാലത്തിനുസൃതമായ വിപണന തന്ത്രങ്ങള്‍ ആവഷ്‌കരിക്കണമെന്ന് എം.എല്‍.എ പറഞ്ഞു. വൈവിധ്യമാര്‍ന്ന ഗ്രാമ വ്യവസായ ഉല്‍പന്നങ്ങള്‍ ഉള്‍പ്പെടുത്തിയ പ്രദര്‍ശനം 22ന് അവസാനിക്കും. രാവിലെ 10 മുതല്‍ വൈകിട്ട് ഏഴു വരെ പൊതുജനങ്ങള്‍ക്ക് സൗജന്യമായി സന്ദര്‍ശിക്കാം.
കച്ചിനാരുകള്‍ കൊണ്ടുള്ള ചിത്രങ്ങള്‍, ആയൂര്‍വ്വേദ ഉല്‍പന്നങ്ങള്‍, ശുദ്ധമായ എണ്ണയില്‍ തയ്യാറാക്കിയ പലഹാരങ്ങള്‍, ഭക്ഷ്യസാമഗ്രികള്‍, ഗുണമേന്മയേറിയ കശുവണ്ടി ഉല്‍പന്നങ്ങള്‍, സുഗന്ധദ്രവ്യവസ്തുക്കള്‍, പ്രകൃതിദത്തമായ ബാഗുല്‍പ്പന്നങ്ങള്‍ എന്നിവ മേളയില്‍ ലഭിക്കും. പി.എം.ഇ.ജി.പി പദ്ധതിയിലെ ഗ്രാമവ്യവസായ യൂനിറ്റുകളാണ് പ്രദര്‍ശനത്തില്‍ പങ്കെടുക്കുന്നത്.
കോര്‍പ്പറേഷന്‍ കൗണ്‍സിലര്‍ റീന സെബാസ്റ്റ്യന്‍ അധ്യക്ഷത വഹിച്ചു. ജില്ലാ വ്യവസായ കേന്ദ്രം ജനറല്‍ മാനേജര്‍ ഹെലന്‍ ജെറോം സ്റ്റാളുകളുടെ ഉദ്ഘാടനം നിര്‍വഹിച്ചു. ജില്ലാ ഇന്‍ഫര്‍മേഷന്‍ ഓഫിസര്‍ സി അജോയ്, ലീഡ് ബാങ്ക് മാനേജര്‍ എ പത്മകുമാര്‍, ഖാദി പ്രോജക്ട് ഓഫിസര്‍ പി റ്റി അനുമോദ്, ഖാദി അസിസ്റ്റന്റ് രജിസ്ട്രാര്‍ എ ബീനാ ബീവി തുടങ്ങിയവര്‍ ചടങ്ങില്‍ സംസാരിച്ചു.