വാഷിങ്ടണ്‍: ടെക്‌സസിലെ ഹൈസ്‌കൂളില്‍ വെടിവയ്പ് നടത്തിയത് 17കാരന്‍. അമേരിക്കന്‍ സ്വദേശിയായ ദിമിത്രിയോസ് പാഗോര്‍ട്‌സിസ് ആണ് ആക്രമണം നടത്തിയത്. ഇയാളെ പൊലിസ് അറസ്റ്റ് ചെയ്തിട്ടുണ്ട്. ദിമിത്രിയോസിന്റെ പിതാവില്‍നിന്ന് റിവോള്‍വര്‍ പിടിച്ചെടുക്കുകയും ചെയ്തിട്ടുണ്ട്.
പ്രാദേശിക സമയം വെള്ളിയാഴ്ച രാവിലെ ടെക്‌സാസിലെ സാന്റ ഫെ ഹൈസ്‌കൂളിലാണു തോക്കുമായെത്തിയ 17കാരന്‍ വിദ്യാര്‍ഥികള്‍ക്കുനേരെ വെടിയുതിര്‍ത്തത്. സ്‌കൂള്‍ ആരംഭിച്ച് അധികം വൈകാതെയായിരുന്നു ആക്രമണം. സംഭവത്തില്‍ പത്തുപേരാണ് കൊല്ലപ്പെട്ടത്. ഇതില്‍ ഏറെ പേരും വിദ്യാര്‍ഥികളാണ്.
കൊല്ലപ്പെട്ടവരില്‍ പാകിസ്താനില്‍നിന്നുള്ള ഒരു വിദ്യാര്‍ഥിയുമുണ്ടെന്നു സ്ഥിരീകരിച്ചു. 18കാരിയായ സാബിക ശൈഖ് ആണ് കൊല്ലപ്പെട്ട പാക് സ്വദേശി.
ഫെബ്രുവരിയില്‍ ഫ്‌ളോറിഡയിലെ പാര്‍ക്‌ലാന്‍ഡില്‍ നടന്ന വെടിവയ്പ്പിനു ശേഷം അമേരിക്കയില്‍ നടക്കുന്ന ഏറ്റവും വലിയ സ്‌കൂള്‍ ആക്രമണമാണിത്.