രാജാക്കാട്: വീടിനകത്ത് ചാരായ നിര്‍മാണത്തിലേര്‍പ്പെട്ടിരുന്നയാളെ എക്‌സൈസ് സംഘം പിടികൂടി. രാജാക്കാട് വാക്കാസിറ്റി പൈങ്കുളംകുന്നേല്‍ ബോബിന്‍ പീറ്റര്‍ (27) നെയാണ് ഉടുമ്പന്‍ചോല എക്‌സൈസ് സംഘം പിടികൂടിയത്.
രഹസ്യവിവരത്തെതുടര്‍ന്ന് ഇന്നലെ രാവിലെ എക്‌സൈസ് സംഘം ബോബിന്റെ വീട് പരിശോധിച്ചപ്പോഴാണ് 30 ലിറ്റര്‍ ചാരായവും 150 ലിറ്റര്‍ കോടയും വാറ്റുപകരണങ്ങളും കണ്ടെത്തിയത്. എക്‌സൈസ് സംഘം എത്തിയപ്പോള്‍ അടുക്കളയില്‍ ബോബിന്‍ ചാരായം വാറ്റുകയായിരുന്നു. കൂടിയ അളവില്‍ ചാരായം വാറ്റി വില്‍ക്കുന്നയാളാണ് പ്രതിയെന്ന് എക്‌സൈസ് ഉദ്യോഗസ്ഥര്‍ പറഞ്ഞു. വാറ്റുപകരണങ്ങളും ചാരായവും കസ്റ്റഡിയിലെടുത്ത എക്‌സൈസ് സംഘം കോട നശിപ്പിച്ചുകളഞ്ഞു. പ്രതിയെ അടിമാലി കോടതിയില്‍ ഹാജരാക്കി റിമാന്റ് ചെയ്തു. ഉടുമ്പന്‍ചോല എക്‌സൈസ് അസിസ്റ്റന്റ് ഇന്‍സ്‌പെക്ടര്‍ പി.പി. ഉണ്ണികൃഷ്ണന്‍, പ്രിവന്റീവ് ഓഫിസര്‍ എസ്. ശ്രീകുമാര്‍, സിവില്‍ എക്‌സൈസ് ഓഫിസര്‍മാരായ ലിജോ ജോസഫ്, വി.എ ജോഷി, എം.നൗഷാദ്, എ. സിയാദ്, ആസിഫ് അലി, ഷിബു ജോസഫ് എന്നവരാണ് റെയ്ഡില്‍ പങ്കെടുത്തത്.